پشاور – 8 ستمبر 2025:
خیبر پختونخوا حکومت نے ڈیجیٹل گورننس کی جانب ایک اور بڑا قدم اٹھاتے ہوئے سرکاری ملازمین کے لیے ای-پنشن سسٹم متعارف کرانے کا فیصلہ کیا ہے۔ وزیراعلیٰ علی امین خان گنڈاپور نے “احساس ای-پنشن سسٹم” کے اجراء کی منظوری دے دی ہے، جو یکم جنوری 2026 سے باضابطہ طور پر نافذ العمل ہوگا۔ اس نئے نظام کا مقصد پنشن کے روایتی پیپر بیسڈ عمل کو ختم کر کے ایک مکمل طور پر خودکار، شفاف اور پیپر لیس سسٹم متعارف کرانا ہے۔
ای-پنشن سسٹم کے لیے وزیراعلیٰ سیکرٹریٹ کی جانب سے ایک تفصیلی کانسپٹ پیپر تیار کیا گیا ہے، جسے عملی شکل دینے کے لیے محکمہ خزانہ کو احکامات جاری کر دیے گئے ہیں۔ اس نظام کے تحت ریٹائرمنٹ سے چھ ماہ قبل ملازمین ایک آسان سا ڈیجیٹل فارم پُر کرکے اپنی پنشن کا کیس آن لائن جمع کروا سکیں گے۔ تمام مطلوبہ دستاویزات اسکین کرکے اسی پورٹل پر اپ لوڈ کی جائیں گی۔ سسٹم خودکار طریقے سے متعلقہ افسران کے لیے ٹائم باؤنڈ ٹاسکس تخلیق کرے گا، جس سے ویری فکیشن اور منظوری کا عمل تیز اور مؤثر ہو جائے گا۔
نئے سسٹم میں کسی بھی مرحلے پر فزیکل فائل یا کاغذ استعمال نہیں کیا جائے گا۔ تمام آرڈرز بشمول ریٹائرمنٹ، سینکشن، پنشن پیپرز اور پنشن پیمنٹ آرڈر ڈیجیٹل دستخط کے ساتھ جاری ہوں گے اور قانونی طور پر قابل قبول ہوں گے۔ اس ای-پنشن پلیٹ فارم کو نادرا، اکاؤنٹنٹ جنرل آفس اور بینکوں سے بھی منسلک کیا جائے گا تاکہ پنشن کی ادائیگی مقررہ وقت کے اندر ریٹائرڈ ملازمین کے اکاؤنٹس میں براہ راست منتقل ہو سکے۔
اس نظام کے تحت وزیراعلیٰ، چیف سیکرٹری اور سیکرٹری خزانہ پنشن عمل کی کارکردگی کو آن لائن ڈیش بورڈ کے ذریعے مانیٹر کر سکیں گے، جس سے نہ صرف شفافیت بڑھے گی بلکہ جوابدہی کا ایک مؤثر نظام بھی قائم ہوگا۔ ای-پنشن سسٹم کے نفاذ کو یقینی بنانے کے لیے حکومت نے دس نکاتی روڈ میپ تیار کیا ہے، جس میں تمام متعلقہ اداروں کو واضح اہداف اور ٹائم لائنز دی گئی ہیں۔ 15 جنوری 2026 کو ای-پنشن سسٹم کے باضابطہ افتتاح کا ہدف مقرر کیا گیا ہے۔
وزیراعلیٰ علی امین گنڈاپور کا کہنا ہے کہ اس نظام کے نفاذ سے پنشن کے اجرا کا دورانیہ مہینوں سے کم ہو کر محض دو سے چار ہفتے رہ جائے گا۔ سرکاری ملازمین کو پنشن کے حصول کے لیے دفاتر کے چکر نہیں لگانے پڑیں گے اور انہیں موجودہ نظام میں درپیش پیچیدگیوں اور مشکلات سے نجات ملے گی۔ ان کا کہنا تھا کہ یہ نظام شفافیت، کارکردگی اور جدید طرز حکمرانی کی جانب ایک اہم قدم ہے۔
انہوں نے مزید کہا کہ خیبر پختونخوا ملک کا پہلا صوبہ ہوگا جو ای-پنشن سسٹم متعارف کرا رہا ہے، اور صوبائی حکومت عمران خان کے وژن کے مطابق خیبر پختونخوا کو مکمل طور پر ڈیجیٹل بنانے کے لیے تیزی سے اقدامات کر رہی ہے۔ اب تک 36 سے زائد عوامی خدمات کو آن لائن کیا جا چکا ہے، جبکہ دیگر سروسز کو بھی ڈیجیٹل پلیٹ فارمز پر منتقل کرنے کے لیے کام جاری ہے۔
