نئے گھریلو گیس کنکشن کے لیے طریقہ کار متعارف، سیکیورٹی ڈپازٹ 20,000 روپے مقرر

سوئی نادرن گیس پائپ لائنز لمیٹڈ (ایس این جی پی ایل) نے نئے گھریلو گیس کنکشن کے حصول کے لیے ایک آسان اور شفاف طریقہ کار متعارف کرایا ہے۔ اس کے تحت نئے کنکشن کے لیے سیکیورٹی ڈپازٹ 20,000 روپے مقرر کیا گیا ہے، جبکہ 10 مرلے تک کے گھروں کے لیے کنکشن فیس 21,000 روپے اور 10 مرلے سے بڑے گھروں کے لیے 23,000 روپے طے کی گئی ہے۔ صارفین درخواست فارم قریبی ریجنل آفس سے یا کمپنی کی آفیشل ویب سائٹ سے ڈاؤن لوڈ کر سکتے ہیں، جو بڑے حروف میں پُر کیا جائے گا اور نیٹ ورک کی دستیابی کے مطابق منظور ہوگا۔ ضروری دستاویزات میں قومی شناختی کارڈ کی کاپی، جائیداد کی ملکیت کا ثبوت، اور ہمسایہ جائیداد کا گیس بل شامل ہیں۔ فارم اور کاغذات جمع کرانے کے بعد ایس این جی پی ایل کی ٹیم سائٹ کا معائنہ کرے گی، اور منظوری پر درخواست دہندہ کو پروپوزل لیٹر یا ڈیمانڈ نوٹس جاری کیا جائے گا، جس میں انسٹالیشن کے رہنما اصول اور منظور شدہ کنٹریکٹرز کی فہرست ہوگی۔ حکام کے مطابق یہ اقدام صارفین کو کم قیمت پر گیس کی سہولت فراہم کرنے اور کمپنی کی سروسز کو بہتر بنانے کے لیے اٹھایا گیا ہے۔