پشاور میں تیسری انٹرنیشنل لائیو سٹاک، پولٹری اینڈ فشریز ایکسپو 2025 کا افتتاح، سرمایہ کاروں اور کسانوں میں خوب پذیرائی

پشاور میں تیسری انٹرنیشنل لائیو سٹاک پولٹری اینڈ فشریز ایکسپو 2025 کا افتتاح 17 ستمبر کو گل مکئی پیلس ناردرن بائی پاس پشاور میں ہوا۔ یہ دو روزہ ایکسپو صوبائی حکومت لائیو سٹاک فشریز اینڈ کوآپریٹوز ڈیپارٹمنٹ اور لائیو سٹاک اینڈ پولٹری ویلفیئر ایسوسی ایشن کے اشتراک سے منعقد ہو رہا ہے جس میں سرمایہ کار کسان طلبہ اور بین الاقوامی کمپنیوں کی بڑی تعداد شریک ہوئی۔ ایکسپو کا مقصد مقامی کسانوں کو جدید ٹیکنالوجی عملی حل اور عالمی معیار کی معلومات فراہم کرنا ہے تاکہ صوبہ دودھ گوشت انڈے اور ڈیری پروڈکٹس میں خود کفیل بن سکے۔
افتتاح کی تقریب میں سیکرٹری لائیو سٹاک فشریز اینڈ کوآپریٹوز ڈیپارٹمنٹ محمد طاہر اورکزئی نے شمع روشن کی۔ ان کے ہمراہ ڈائریکٹر جنرل لائیو سٹاک ایکسٹینشن ڈاکٹر اسل خان ڈائریکٹر جنرل لائیو سٹاک ریسرچ اعجاز علی ڈائریکٹر جنرل فشریز محمد شفیع مروان صوبائی صدر لائیو سٹاک ویلفیئر ایسوسی ایشن آصف اعوان صوبائی صدر پولٹری ایسوسی ایشن راج ولی محمود اور دیگر سینیئر افسران موجود تھے۔ تقریب کے دوران سیکرٹری طاہر اورکزئی نے مختلف سٹالز کا معائنہ کیا اور جدید آلات و ٹیکنالوجی پر دلچسپی کا اظہار کیا۔
میڈیا سے گفتگو کرتے ہوئے سیکرٹری نے کہا کہ یہ ایکسپو مقامی معیشت کو مضبوط بنائے گا اور بین الاقوامی سرمایہ کاری کو راغب کرے گا۔ اس سے پاکستان کے لائیو سٹاک اور زرعی شعبوں پر مثبت اثرات مرتب ہوں گے۔ ایکسپو میں سرکاری اداروں نجی کمپنیوں عالمی تنظیموں اور مقامی فرموں کے سٹالز لگائے گئے ہیں جہاں کسانوں اور صنعت کاروں کو جدید حل اور رہنمائی فراہم کی جا رہی ہے۔ پہلے دن سرمایہ کاروں کسانوں اور جدید ٹیکنالوجی لانے والی بین الاقوامی کمپنیوں کی شرکت نے ایکسپو کو رنگین بنایا۔
ایکسپو میں پولٹری فیڈ ڈیری آلات فشریز پروڈکٹس ویٹرنری میڈیسنز اور لائیو سٹاک مینجمنٹ کے جدید طریقوں کی نمائش کی جا رہی ہے۔ چیف آرگنائزر ان باکس پاکستان اور لائیو سٹاک ڈیپارٹمنٹ کی جانب سے یہ اہتمام کیا گیا ہے جس میں آل پاکستان لائیو سٹاک اینڈ پولٹری کوآپریٹو سوسائٹی کا تعاون حاصل ہے۔ صوبائی وزیر لائیو سٹاک فضل حکیم خان یوسفزئی نے ایکسپو کی تیاریوں کا جائزہ لیتے ہوئے ہدایت کی تھی کہ اسے صوبائی معیشت کی ترقی کا اہم ذریعہ بنایا جائے۔
شرکاء نے بتایا کہ ایکسپو نے کسانوں میں پرجوش ردعمل پیدا کیا ہے۔ آزاد اردو کی رپورٹ کے مطابق نمائندہ سید ذیشان نے کسانوں اور صنعت کاروں سے انٹرویوز کیے جنہوں نے کہا کہ یہ ایکسپو عالمی سطح کی معلومات اور سستے حل فراہم کر رہا ہے جو سیلاب جیسے حالات میں لائیو سٹاک کے نقصانات کو کم کرنے میں مددگار ثابت ہوگا۔ ایک کسان نے کہا کہ نئی ٹیکنالوجی سے شعبہ جدید خطوط پر استوار ہو جائے گا اور برآمدات بڑھ سکیں گی۔ ایکسپو میں طلبہ اور خواتین کی شرکت بھی نمایاں رہی جو مختلف سٹالز پر جدید آلات دیکھنے پہنچیں۔