کراچی کے علاقے اپر گزری میں خاتون پر تیزاب پھینکنے کے واقعے میں ملوث مبینہ ملزم کو پولیس نے پنجاب سے گرفتار کرلیا۔
پولیس کے مطابق ملزم نے دو روز قبل اپر گزری کے علاقے میں خاتون پر تیزاب پھینکا اور واقعے کے بعد فرار ہوگیا تھا۔ واقعے کی اطلاع ملنے پر پولیس نے تحقیقات شروع کرتے ہوئے ملزم کی گرفتاری کے لیے کارروائی کا آغاز کیا۔
ڈی آئی جی ساؤتھ اسد رضا کے مطابق پولیس نے ملزم کا سراغ لگانے کے بعد اسے پنجاب سے گرفتار کیا۔ پولیس ٹیم ملزم کو پنجاب سے کراچی منتقل کر رہی ہے۔
پولیس حکام کا کہنا ہے کہ ملزم سے واقعے کے محرکات اور دیگر پہلوؤں کے حوالے سے تفتیش کی جائے گی، جبکہ متاثرہ خاتون سے متعلق بھی ضروری قانونی کارروائی جاری ہے۔
پولیس کے مطابق تفتیش کے دوران واقعے سے متعلق مزید اہم معلومات سامنے آنے کی توقع ہے۔
