ایبٹ آباد: ڈپٹی کمشنر ایبٹ آباد سرمد سلیم اکرم نے ڈویژنل ہیڈ کوارٹر ایبٹ آباد میں انسدادِ پولیو مہم کا باضابطہ افتتاح کیا اور بچوں کو پولیو سے بچاؤ اور وٹامن اے کے قطرے پلائے۔
تقریب میں ایڈیشنل ڈپٹی کمشنر جنرل، ڈی ایچ او ایبٹ آباد، ایم ایس ڈی ایچ کیو، ڈی ایس پی ہیڈ کوارٹر، ڈپٹی ڈی ایچ او، ڈبلیو ایچ او ایریا کوآرڈینیٹر، ڈسٹرکٹ خطیب، نمائندگان ڈبلیو ایچ او، ہیلتھ کوآرڈینیٹرزاور دیگر ضلعی و ہیلتھ افسران شریک ہوئے۔
چار روزہ مہم کے دوران ضلع ایبٹ آباد کی 54 یونین کونسلز میں پانچ سال تک کی عمر کے 2,25,469 بچوں کو پولیو سے بچاؤ اور وٹامن اے کے قطرے پلائے جائیں گے۔
مہم کے دوران 6 ماہ سے 11 ماہ کے بچوں کو نیلے رنگ کے وٹامن اے لیکویڈ کیپسول جبکہ 12 ماہ سے 59 ماہ کے بچوں کو سرخ رنگ کے وٹامن اے کیپسول/ ڈراپس بھی پلائے جائیں گے۔
مہم کے لیے 1688 ٹیمیں تشکیل دی گئی ہیں جو گھر گھر جا کر ویکسینیشن کا عمل مکمل کریں گی۔ اس کے علاوہ 64 یو سی ایم اوز اور 38 ڈی پی ایم ٹیز مہم کی نگرانی کریں گے، جبکہ ضلعی انتظامیہ کی جانب سے ایڈیشنل ڈپٹی کمشنرز، اسسٹنٹ کمشنرز اور ایڈیشنل اسسٹنٹ کمشنرز بھی ٹیموں کی مانیٹرنگ کریں گے۔
ڈپٹی کمشنر ایبٹ آباد سرمد سلیم اکرم نے محکمہ صحت کو کارکردگی میں بہتری، تمام بچوں کی ویکسینیشن مکمل کرنے اور ایس او پیز پر سختی سے عملدرآمد کی ہدایت کی۔ پولیس کو ٹیموں کے لیے فول پروف سکیورٹی فراہم کرنے جبکہ والدین پر زور دیا گیا کہ وہ مہم کے دوران ٹیموں سے تعاون کریں اور اپنے بچوں کو پولیو سے بچاؤ کے قطرے ضرور پلائیں تاکہ ایبٹ آباد کو پولیو فری ضلع بنایا جا سکے۔
📞 شہری انسدادپولیو مہم سے متعلق کسی بھی معلومات یا شکایات کے لیے رابطہ کریں:
ضلعی کنٹرول روم ایبٹ آباد: 09929310553
ڈسٹرکٹ پولیو کنٹرول روم: 09929310567
