🟩 ڈپٹی کمشنر مانسہرہ میاں بہزاد عادل کو گریڈ 19 میں ترقی.

مانسہرہ: (مانسہرہ_ڈاٹ_کام) حکومتِ خیبرپختونخوا نے ڈپٹی کمشنر مانسہرہ میاں بہزاد عادل کی شاندار کارکردگی کو سراہتے ہوئے انہیں گریڈ 18 سے گریڈ 19 میں ترقی دے دی ہے۔ اس اہم پیش رفت کے بعد انہیں بدستور ضلع مانسہرہ میں اپنی ذمہ داریاں جاری رکھنے کے احکامات بھی جاری کر دیے گئے ہیں۔
میاں بہزاد عادل نے اپنے دورِ تعیناتی کے دوران انتظامی امور میں بہتری، عوامی مسائل کے فوری حل، اور سرکاری اداروں کی کارکردگی کو مؤثر بنانے میں نمایاں کردار ادا کیا۔ ان کی قیادت میں ضلع میں ترقیاتی منصوبوں پر تیزی سے عملدرآمد، عوامی شکایات کے ازالے کے لیے بروقت اقدامات، اور قانون و انتظام کی صورتحال کو بہتر بنانے میں واضح بہتری دیکھنے میں آئی۔
ضلعی سطح پر گڈ گورننس، شفافیت اور عوامی خدمت کے حوالے سے ان کی کوششوں کو نہ صرف اعلیٰ حکام بلکہ عوامی حلقوں کی جانب سے بھی خوب سراہا گیا۔ ان کی ترقی کو ایک قابل افسر کی محنت، دیانتداری اور پیشہ ورانہ صلاحیتوں کا اعتراف قرار دیا جا رہا ہے۔
عوامی و سماجی حلقوں نے امید ظاہر کی ہے کہ میاں بہزاد عادل مستقبل میں بھی اسی جذبے کے ساتھ عوامی خدمت کا سلسلہ جاری رکھیں گے اور ضلع مانسہرہ کو مزید ترقی کی راہ پر گامزن کریں گے۔