غیر ملکی خاتون سیاح سے نامناسب سوالات، ڈی آئی جی ہزارہ کا سخت ایکشن

ہزارہ ڈویژن کے ڈی آئی جی ناصر محمود ستی نے غیر ملکی خاتون سیاح سے پولیس اہلکاروں کی جانب سے غیر ضروری سوالات کرنے کے واقعے کا سخت نوٹس لیتے ہوئے فوری کارروائی کی ہے۔ واقعے میں ملوث لیڈنگ ہیڈ کانسٹیبل خیرالرحمن کو معطل کر دیا گیا ہے، جبکہ کانسٹیبل شاہد اور وسیم کو شوکاز نوٹس جاری کیے گئے ہیں۔
تحقیقات کے لیے ڈی پی او بٹگرام محمد ایاز خان کو انکوائری آفیسر مقرر کیا گیا ہے، جو جلد از جلد مکمل رپورٹ ڈی آئی جی ہزارہ کو پیش کریں گے۔
ڈی آئی جی ناصر محمود ستی نے کہا کہ ہزارہ پولیس کا بنیادی مقصد نظم و ضبط، پیشہ ورانہ رویہ، سیاح دوست ماحول اور سیاحوں کے تحفظ کو یقینی بنانا ہے۔ انہوں نے واضح کیا کہ کسی بھی قسم کی غفلت یا غیر ذمہ دارانہ رویہ برداشت نہیں کیا جائے گا۔
انہوں نے بتایا کہ آئی جی خیبرپختونخوا ذوالفقار حمید کی ہدایات پر عمل کرتے ہوئے پولیس اہلکاروں کے لیے خصوصی ورکشاپس اور ٹریننگ سیشنز کا انعقاد کیا جائے گا تاکہ غیر ملکی سیاحوں کے ساتھ خوش اسلوبی اور دوستانہ رویہ اپنایا جائے۔ اس سے نہ صرف ایسے واقعات کی روک تھام ہوگی بلکہ خیبرپختونخوا پولیس کا سیاح دوست امیج بھی برقرار رہے گا۔