مانسہرہ : مانسہرہ بالاکوٹ ڈویژن میں جاری چائنیز پراجیکٹس کیمپس پر ضلعی انتظامیہ، مانسہرہ پولیس اور دیگر قانون نافذ کرنے والے اداروں کا مشترکہ سیکیورٹی آڈٹ۔
تفصیلات کے مطابق ڈپٹی کمشنر مانسہرہ میاں بہزادعادل اور ڈسٹرکٹ پولیس آفیسر مانسہرہ شفیع اللہ گنڈا پور کے احکامات پر بالاکوٹ ڈویژن میں جاری مختلف چائنیز پراجیکٹس کیمپس پر ضلعی انتظامیہ، مانسہرہ پولیس اور دیگر قانون نافذ کرنے والے اداروں نے مشترکہ سیکیورٹی آڈٹ کا انعقاد کیا۔
اس موقع پر اسسٹنٹ کمشنر مانسہرہ فراز قریشی، ایس ایس پی اسپیشل سیکیورٹی یونٹ نیاز گل، ایس پی بالاکوٹ جہانزیب خان سمیت متعلقہ محکموں کے دیگر افسران بھی موجود تھے۔ ٹیم نے پراجیکٹس کے مختلف حصوں کا دورہ کیا، سیکیورٹی انتظامات، داخلی و خارجی پوائنٹس، چیک پوسٹس، اور ڈیوٹی پر مامور اہلکاروں کی تعیناتیوں کا تفصیلی جائزہ لیا۔
افسران نے موقع پر موجود پولیس و سیکیورٹی اہلکاروں کو ڈیوٹی کے حوالے سے ہدایات جاری کرتے ہوئے کہا کہ چائنیز ورکرز اور پراجیکٹس پر کام کرنے والے عملے کا تحفظ اولین ترجیح ہے۔ کسی بھی مشتبہ سرگرمی پر کڑی نظر رکھی جائے اور سیکیورٹی انتظامات کو مزید مؤثر بنایا جائے۔
