بٹگرام: ڈیپٹی کمشنر بٹگرام کی خصوصی ہدایات پر اسسٹنٹ کمشنر شیر دل احمد نے اسسٹنٹ کمشنر رضوان برکی کے ہمراہ بٹگرام کے مختلف علاقوں میں قائم چئیر لفٹوں کا تفصیلی معائنہ کیا۔
دورے کے دوران دونوں افسران نے چئیر لفٹوں کے حفاظتی انتظامات، کیبلز کی مضبوطی، اسٹیل ڈھانچے کی حالت، آپریٹنگ سسٹم اور مسافروں کے لیے مہیا کردہ سہولیات کا باریک بینی سے جائزہ لیا۔
انہوں نے موقع پر موجود لفٹ مالکان اور آپریٹرز کو ہدایت کی کہ مسافروں کی جان و مال کے تحفظ کو ہر حال میں یقینی بنایا جائے، اور لفٹوں کی روزانہ بنیاد پر فنی چیکنگ، حفاظتی بیلٹس، اور مشینری کی دیکھ بھال کو معمول بنایا جائے۔
مزید برآں، افسران نے واضح کیا کہ کسی بھی قسم کی غفلت یا حفاظتی اصولوں سے انحراف برداشت نہیں کیا جائے گا۔ انہوں نے ہدایت دی کہ تمام لفٹوں پر نمایاں مقامات پر حفاظتی ہدایات آویزاں کی جائیں تاکہ عوام کو استعمال کے دوران احتیاطی تدابیر سے آگاہی حاصل ہو۔
آخر میں، اسسٹنٹ کمشنر شیر دل احمد نے کہا کہ ضلعی انتظامیہ عوام کے جان و مال کے تحفظ کو اولین ترجیح دیتی ہے، اور اس سلسلے میں چئیر لفٹوں کے تمام مالکان انتظامیہ کے ساتھ بھرپور تعاون کریں تاکہ کسی بھی ناخوشگوار واقعے سے بچا جا سکے۔
