مانسہرہ : شعبہ بایوٹیکنالوجی اینڈ جینیٹک انجینئرنگ، ہزارہ یونیورسٹی مانسہرہ کے زیراہتمام اور شوکت خانم میموریل کینسر اسپتال و ریسرچ سینٹر کے تعاون سے بریسٹ کینسر آگاہی سیمینار ایجوکیشن ڈیپارٹمنٹ آڈیٹوریم میں منعقد ہوا ۔
تقریب کا آغاز تلاوتِ قرآنِ پاک سے ہوا، جس کے بعد ڈین فیکلٹی آف بایولوجیکل اینڈ ہیلتھ سائنسز، پروفیسر ڈاکٹر انعام اللہ نے خوش آمدیدی کلمات ادا کیے اور خواتین میں کینسر کی آگاہی و بروقت تشخیص کی اہمیت پر روشنی ڈالی۔ ملک کے معروف ماہرین نے بریسٹ کینسر کی ابتدائی تشخیص، خطرات اور علاج کے جدید طریقہ کار پر اپنے علم اور تجربات کا تبادلہ کیا۔
ڈاکٹر ماہنور ندیم شوکت خانم میموریل کینسر اسپتال و ریسرچ سینٹر نے “بریسٹ کینسر کی اقسام، خطرناک عوامل اور خود معائنہ کی اہمیت” کے موضوع پر لیکچر دیا۔ انہوں نے بتایا کہ پاکستان میں ہر نو میں سے ایک خاتون اس مرض کا شکار ہوتی ہے، اور زور دیا کہ خود معائنہ اور وقتاً فوقتاً میموگرافی کے ذریعے ابتدائی مرحلےمیں تشخیص ہی زندگی بچا سکتی ہے۔
ڈاکٹر علی طلحہ خلیل(لیڈی ریڈنگ اسپتال، پشاور) نے جینیاتی مارکرز کی بنیاد پر درست تشخیص اور علاج میں پریسژن میڈیسن کی اہمیت پر روشنی ڈالی اور بتایا کہ جدید جینیاتی ٹیسٹ کس طرح مریض کے لیے درست اور مؤثر علاج کے انتخاب میں مددگار ہیں۔
ڈاکٹر رضوانہ حسین ایبٹ آباد انسٹی ٹیوٹ آف میڈیکل سائنسز نے صحت مند طرز زندگی اور غذائی منصوبہ بندی کے ذریعے بریسٹ کینسر میں کمی کے موضوع پر گفتگو کی، اور بتایا کہ متوازن خوراک، جسمانی سرگرمی اور وٹامن ڈی کا مناسب استعمال اس بیماری کے خطرات کو نمایاں حد تک کم کرتا ہے۔
تقریب کے اختتام پر پروفیسر ڈاکٹر انعام اللہ نے شرکاء، مقررین اور منتظمین کا شکریہ ادا کیا اور اس بات پر زور دیا کہ ایسی آگاہی مہمات ہی معاشرے میں مثبت تبدیلی کا باعث بنتی ہیں۔ اس پروگرام کے چیف آرگنائزر ڈاکٹر اکرام اللہ اسسٹنٹ پروفیسر، شعبہ بایوٹیکنالوجی و جینیٹک انجینئرنگ کی انتھک محنت اور بہترین انتظامات نے سیمینار کو کامیاب بنایا۔
ادارہ نے محترمہ صوبیہ شوکت (پرنسپل، دی کیمبرج اسکول، بفہ) کا بھی خصوصی شکریہ ادا کیا، جنہوں نے سیمینار کے انتظامات میں بھرپور تعاون کیا۔ یہ آگاہی پروگرام اس عزم کی تجدید تھا کہ خواتین کو علم اور شعور سے بااختیار بنایا جائے تاکہ وہ ابتدائی تشخیص، بروقت تشخیص اور مؤثر علاج کے ذریعے اپنی زندگیوں کو محفوظ بنا سکیں — کیونکہ “ابتدائی تشخیص ہی زندگی بچاتی ہے۔
#بریسٹ_کینسر_آگاہی #ابتدائی_تشخیص #شوکت_خانم #ہزارہ_یونیورسٹی #صحت_خواتین #کینسر_سے_بچاؤ #پنک_اکتوبر #تعلیم_برائے_زندگی
