مشرقِ وسطیٰ میں جاری کشیدگی اور یمن میں لڑائی کے باعث عالمی منڈی میں خام تیل کی قیمت 100 ڈالر فی بیرل سے تجاوز کر گئی ہے، جس کے بعد پاکستان میں پیٹرولیم مصنوعات کی قیمتوں میں مسلسل اضافہ ہوا ہے۔
وزیراعظم شہباز شریف نے عوام کو بڑھتی ہوئی پیٹرول قیمتوں سے ریلیف دینے کے لیے نئی اسکیم کا اعلان کیا ہے، جس کے تحت موٹرسائیکل، رکشہ، چنگچی اور 800 سی سی تک کی چھوٹی گاڑیوں کے صارفین کو پیٹرول پر 100 روپے فی لیٹر ریلیف دیا جائے گا۔
حکومت کے مطابق موٹرسائیکل، رکشہ اور چنگچی سمیت دو اور تین پہیوں والی سواریوں کے لیے ماہانہ 20 لیٹر تک پیٹرول پر ریلیف دیا جائے گا، جبکہ 800 سی سی تک کی گاڑیوں کے مالکان کو ماہانہ 30 لیٹر پیٹرول پر 100 روپے فی لیٹر کے حساب سے ریلیف ملے گا۔
وزیراعظم آفس کے مطابق اسلام آباد میں اسکیم کا اطلاق پیر اور منگل کی درمیانی شب جبکہ ملک بھر، بشمول گلگت بلتستان اور پاکستان کے زیرِ انتظام کشمیر، میں بدھ اور جمعرات کی درمیانی شب سے ہوگا۔
خصوصی ریلیف اسکیم کے لیے رجسٹریشن کا آغاز بھی کر دیا گیا ہے، جبکہ اس کے طریقہ کار سے متعلق عوام کو آگاہی مہم کے ذریعے معلومات فراہم کی جائیں گی۔
دوسری جانب اوگرا کے حالیہ نوٹیفکیشن کے مطابق 12 ستمبر سے پیٹرول کی قیمت میں 5 روپے فی لیٹر اضافہ کیا گیا، جس کے بعد نئی قیمت 375 روپے 82 پیسے فی لیٹر مقرر ہوئی، جبکہ ڈیزل کی قیمت 403 روپے 32 پیسے فی لیٹر ہوگئی۔
عالمی سطح پر تیل کی قیمتوں میں اضافے کی بڑی وجہ مشرقِ وسطیٰ میں جاری کشیدگی اور تیل کی ترسیل میں ممکنہ رکاوٹیں قرار دی جا رہی ہیں۔ ایسے حالات میں پاکستان جیسے درآمدی تیل پر انحصار کرنے والے ممالک پر اضافی معاشی دباؤ بڑھنے کا خدشہ ہے۔
اس صورتحال میں یہ سوال بھی اہم ہے کہ آیا حکومت پیٹرولیم لیوی میں مزید کمی کرکے عوام کو براہِ راست اضافی ریلیف دے سکتی ہے یا نہیں۔
پیٹرول پر 100 روپے فی لیٹر ریلیف، حکومت نے نئی اسکیم کا اعلان کردیا.
30
