ہری پور پولیس میں ریٹائرمنٹ تقریب، سب انسپکٹر مصطفیٰ خان کو شاندار خراجِ تحسین.

ہری پور: ڈسٹرکٹ پولیس آفیسر (ڈی پی او) ہری پور شفیع اللہ گنڈاپور کی زیرِ صدارت محکمہ پولیس میں اپنی طویل اور باوقار خدمات مکمل کر کے ریٹائر ہونے والے سب انسپکٹر مصطفیٰ خان کے اعزاز میں ایک سادہ مگر باوقار تقریب کا انعقاد کیا گیا۔ تقریب میں پولیس افسران، آفس سٹاف اور اہلکاروں کی بڑی تعداد نے شرکت کر کے ریٹائر ہونے والے افسر کو خراجِ تحسین پیش کیا۔
تقریب کے دوران ڈی پی او شفیع اللہ گنڈاپور نے اپنے خطاب میں کہا کہ پولیس فورس ایک خاندان کی مانند ہے، جہاں ہر افسر اور اہلکار اپنی ذمہ داری نہایت ایمانداری اور جذبے کے ساتھ نبھاتا ہے۔ انہوں نے سب انسپکٹر مصطفیٰ خان کی پیشہ ورانہ خدمات، دیانتداری، فرض شناسی اور قانون کی پاسداری کو سراہتے ہوئے کہا کہ ان جیسے افسران محکمہ پولیس کا قیمتی اثاثہ ہوتے ہیں۔
انہوں نے مزید کہا کہ مصطفیٰ خان نے اپنی ملازمت کے دوران نہ صرف امن و امان کے قیام میں اہم کردار ادا کیا بلکہ اپنی محنت، لگن اور بہترین اخلاق سے اپنے ساتھیوں اور افسران کے دل بھی جیتے۔ ان کا تجربہ اور خدمات نئے آنے والے افسران کے لیے ایک روشن مثال ہیں۔
ڈی پی او کا کہنا تھا کہ ریٹائرمنٹ ایک نئے سفر کا آغاز ہے اور محکمہ پولیس اپنے ریٹائرڈ افسران کو کبھی نہیں بھولتا۔ انہوں نے یقین دہانی کروائی کہ ریٹائرڈ افسران کے لیے پولیس کے دروازے ہمیشہ کھلے رہیں گے اور ان کے مسائل کے حل کے لیے ہر ممکن تعاون فراہم کیا جائے گا۔
اس موقع پر سب انسپکٹر مصطفیٰ خان نے اظہارِ خیال کرتے ہوئے کہا کہ محکمہ پولیس میں گزارا گیا وقت ان کی زندگی کا سب سے قیمتی اثاثہ ہے۔ انہوں نے ڈی پی او ہری پور، سینئر افسران اور ساتھی اہلکاروں کا شکریہ ادا کیا کہ انہیں عزت اور احترام کے ساتھ رخصت کیا جا رہا ہے۔
تقریب کے اختتام پر ڈی پی او شفیع اللہ گنڈاپور نے ریٹائر ہونے والے سب انسپکٹر کو اعزازی شیلڈ، تعریفی سرٹیفکیٹ (ستائش نامہ) اور یادگاری تحائف پیش کیے۔ شرکاء نے مصطفیٰ خان کے لیے نیک خواہشات کا اظہار کرتے ہوئے ان کی آئندہ زندگی کے لیے کامیابی اور صحت کی دعا کی۔