حویلیاں شہر میں، خصوصاً محلّہ جات اور بالخصوص محلّہ بیگہ اور اس کے گرد و نواح میں آئس (کرسٹل میتھ) جیسے خطرناک نشے کا استعمال تشویشناک حد تک بڑھ چکا ہے۔
اہلیانِ علاقہ کے مطابق نوجوان نسل تیزی سے اس لعنت کی لپیٹ میں آ رہی ہے، جس کے باعث نہ صرف ان کی جسمانی و ذہنی صحت متاثر ہو رہی ہے بلکہ کئی گھرانے معاشرتی اور نفسیاتی بحران کا بھی شکار ہو رہے ہیں۔ والدین شدید پریشانی میں مبتلا ہیں جبکہ مقامی سطح پر منشیات فروشوں کے خلاف مؤثر کارروائی نہ ہونے پر عوام میں غم و غصہ پایا جاتا ہے۔
مقامی شہریوں کا کہنا ہے کہ آئس جیسی خطرناک منشیات کا پھیلاؤ محض ایک سماجی مسئلہ نہیں بلکہ ایک خاموش تباہی ہے جو آنے والی نسلوں کے مستقبل کو داؤ پر لگا رہی ہے۔ نوجوان بے راہ روی، جرائم اور ذہنی دباؤ کا شکار ہو رہے ہیں۔
اہلیانِ علاقہ نے انتظامیہ، پولیس اور متعلقہ اداروں سے پرزور مطالبہ کیا ہے کہ فوری اور سخت کارروائی کرتے ہوئے منشیات فروش نیٹ ورک کا خاتمہ کیا جائے، مشتبہ عناصر کے خلاف کریک ڈاؤن کیا جائے اور نوجوانوں کو اس لعنت سے بچانے کے لیے آگاہی مہم شروع کی جائے۔
یہ مسئلہ اب صرف ایک محلہ یا شہر تک محدود نہیں رہا بلکہ ایک مکمل سماجی بحران کی شکل اختیار کرتا جا رہا ہے، جس پر فوری توجہ ناگزیر ہے۔
منجانب: اہلیانِ علاقہ حویلیاں
