🚨 ہری پور: سوشل میڈیا پر وائرل ویڈیو کا نوٹس، ملازم کو حبسِ بے جا میں رکھنے والا حجام گرفتار.

📍 ہری پور: سوشل میڈیا پر ایک ویڈیو وائرل ہونے کے بعد، جس میں ایک حجام کو اپنے ملازم کو باندھ کر غیر قانونی طور پر حبسِ بے جا میں رکھتے ہوئے دکھایا گیا، ڈسٹرکٹ پولیس آفیسر (DPO) ہری پور شفیع اللہ گنڈاپور نے واقعے کا فوری نوٹس لیتے ہوئے سخت قانونی کارروائی کے احکامات جاری کر دیے۔
🔹 ڈی پی او ہری پور نے ایس ایچ او تھانہ کوٹ نجیب اللہ عمران نواز کو ہدایت جاری کی کہ متاثرہ ملازم کو فوری طور پر بازیاب کرایا جائے، ملزم کو گرفتار کیا جائے اور قانون کے مطابق مقدمہ درج کرکے کارروائی عمل میں لائی جائے۔
🚔 احکامات کی روشنی میں تھانہ کوٹ نجیب اللہ پولیس نے فوری کارروائی کرتے ہوئے متاثرہ ملازم زین عباس ولد محمد شریف، سکنہ جھنگ کو بحفاظت بازیاب کرا لیا، جبکہ دکان کے مالک آصف ولد کالا خان، سکنہ کانگڑہ کو گرفتار کر لیا گیا۔
⚖️ پولیس کے مطابق، متاثرہ شہری کی درخواست پر ملزم کے خلاف پاکستان پینل کوڈ (PPC) کی دفعہ 342 (حبسِ بے جا) اور دفعہ 506 (دھمکیاں دینا) کے تحت مقدمہ درج کرکے مزید قانونی کارروائی کا آغاز کر دیا گیا ہے۔
🗣️ پولیس حکام کا کہنا ہے کہ کسی بھی شخص کو غیر قانونی طور پر قید میں رکھنا، تشدد یا دھمکیوں کے ذریعے ہراساں کرنا سنگین جرم ہے اور ایسے واقعات میں ملوث افراد کے خلاف بلا امتیاز کارروائی جاری رہے گی۔
📌 دستبرداری: یہ خبر پولیس ذرائع اور دستیاب ابتدائی معلومات کی بنیاد پر صرف معلوماتی اور صحافتی مقاصد کے لیے شائع کی جا رہی ہے۔ واقعے سے متعلق مزید حقائق اور تفتیشی پیش رفت سامنے آنے پر خبر کو اپ ڈیٹ کیا جا سکتا ہے۔