بچوں کے جھگڑے میں صلح کروانے والے وقاص انور کے قتل کا معاملہ، تین نامزد ملزمان گرفتار

بفہ: تھانہ بفہ پولیس نے 16 ستمبر 2026 کو بچوں کے درمیان ہونے والے جھگڑے کے دوران فائرنگ سے جاں بحق ہونے والے نوجوان وقاص انور عرف کاشی کے قتل کیس میں نامزد تینوں ملزمان کو عبوری ضمانتیں منسوخ ہونے کے بعد گرفتار کر لیا۔
پولیس کے مطابق میاں آباد، بفہ میں بچوں کے درمیان تصادم ہوا تھا، جس کے دوران وقاص انور عرف کاشی ولد انور خان نے فریقین کے درمیان صلح صفائی اور بیچ بچاؤ کی کوشش کی۔ اسی دوران ملزمان نے مبینہ طور پر فائرنگ کر دی، جس کے نتیجے میں وقاص انور شدید زخمی ہوئے اور بعد ازاں زخموں کی تاب نہ لاتے ہوئے جاں بحق ہوگئے۔
واقعے کے بعد مقدمے میں نامزد ملزمان نے گرفتاری سے بچنے کے لیے سیشن کورٹ سے عبوری ضمانت (BBA) حاصل کر رکھی تھی۔
عدالت نے عبوری ضمانتیں منسوخ کر دیں
کیس کی سماعت کے دوران پولیس کی جانب سے پیش کیے گئے چالان اور شواہد کی روشنی میں عدالت نے تینوں ملزمان کی عبوری ضمانتیں منسوخ کر دیں۔
عدالتی حکم کے بعد تھانہ بفہ پولیس نے فوری کارروائی کرتے ہوئے تینوں نامزد ملزمان کو احاطۂ عدالت کے باہر سے گرفتار کر لیا اور انہیں تھانے منتقل کر دیا۔
گرفتار ملزمان کی شناخت عدنان، اجمان ولد فضل چن، اور احمد علی ولد عدنان کے نام سے ہوئی ہے، جو میاں آباد، بفہ کے رہائشی بتائے گئے ہیں۔
پولیس کے مطابق ملزمان سے واردات میں مبینہ طور پر استعمال ہونے والا اسلحہ برآمد کرنے اور کیس کی مزید تفتیش کے لیے عدالت سے جسمانی ریمانڈ حاصل کرنے کی کارروائی کی جا رہی ہے۔
پولیس کے مطابق واقعے کی مزید تفتیش جاری ہے اور کیس میں تمام قانونی تقاضے پورے کیے جا رہے ہیں۔