موسمی خرابی کے باعث اسلام آباد کی 2 پروازوں کا رخ تبدیل، ایک ملتان اور دوسری لاہور اتار لی گئی

اسلام آباد: خراب موسمی صورتِ حال اور شدید بارش کے باعث اسلام آباد آنے والی دو پروازوں کا رخ تبدیل کر دیا گیا، جنہیں متبادل طور پر ملتان اور لاہور ایئرپورٹس پر اتار لیا گیا۔
ذرائع کے مطابق پیرس سے اسلام آباد آنے والی پاکستان انٹرنیشنل ایئر لائنز (PIA) کی پرواز کو موسم کی خرابی کے باعث اسلام آباد کے بجائے ملتان ایئرپورٹ پر اتارا گیا۔
اسی طرح ریاض سے اسلام آباد آنے والی نجی فضائی کمپنی کی پرواز کا رخ بھی تبدیل کیا گیا اور اسے لاہور ایئرپورٹ پر اتار لیا گیا۔
دوسری جانب شدید بارش اور خراب موسمی حالات کے باعث بینکاک سے لاہور آنے والی دو پروازوں کو بھی طویل تاخیر کا سامنا کرنا پڑا۔ دونوں پروازوں میں تقریباً ساڑھے 9 گھنٹے تک تاخیر ہوئی۔
رپورٹ کے مطابق گزشتہ رات لاہور پہنچنے والی تھائی ایئر لائنز کی پرواز آج صبح لاہور پہنچی، جبکہ لاہور سے بینکاک روانہ ہونے والی تھائی ایئر لائنز کی پرواز کی روانگی بھی آج صبح متوقع ہے۔
ادھر بینکاک سے کراچی آنے والی دونوں پروازیں تقریباً 20 گھنٹے کی تاخیر کے بعد منسوخ کر دی گئیں، جس کے باعث مسافروں کو مزید مشکلات کا سامنا کرنا پڑا۔
خراب موسم کے باعث مختلف ایئرپورٹس پر پروازوں کے شیڈول اور آمد و رفت متاثر ہوئی ہے، جبکہ مسافروں کو اپنی پروازوں کی تازہ صورتحال ایئرلائنز سے معلوم کرنے کی ہدایت کی گئی ہے۔