خیبر پختونخوا میں سی این جی سیکٹر کیلئے گیس سپلائی عارضی طور پر معطل.

پشاور: کمشنر پشاور ڈویژن کی جانب سے جاری کردہ ایک اہم اعلامیے میں خیبر پختونخوا بھر میں سی این جی سیکٹر کو گیس کی فراہمی عارضی طور پر معطل کرنے کا فیصلہ کیا گیا ہے۔
نوٹیفکیشن کے مطابق یہ فیصلہ گیس کی دستیابی میں کمی اور موجودہ حالات کے پیشِ نظر کیا گیا ہے۔ حکام کا کہنا ہے کہ مقامی گیس کے ذخائر پر بڑھتا ہوا انحصار، خلیجی خطے کی بدلتی صورتحال، اور شمالی ذرائع سے گیس کی سپلائی میں تعطل جیسے عوامل اس فیصلے کی بنیادی وجوہات ہیں۔
اعلامیے میں مزید کہا گیا ہے کہ گیس کی فراہمی میں یہ عارضی بندش نظام کو متوازن رکھنے اور گھریلو و دیگر اہم شعبوں کو ترجیحی بنیادوں پر گیس کی فراہمی یقینی بنانے کے لیے کی گئی ہے۔ حکام کے مطابق موجودہ حالات میں گیس کی منصفانہ تقسیم اور دباؤ کو کنٹرول کرنا ناگزیر ہو چکا ہے۔
کمشنر آفس کی جانب سے متعلقہ اداروں اور ضلعی انتظامیہ کو ہدایات جاری کی گئی ہیں کہ وہ اس فیصلے پر فوری اور مؤثر عملدرآمد کو یقینی بنائیں اور کسی بھی غیر قانونی طور پر گیس کے استعمال یا خلاف ورزی کی صورت میں سخت کارروائی عمل میں لائی جائے۔
حکام نے یہ بھی واضح کیا ہے کہ جیسے ہی گیس کی سپلائی کی صورتحال بہتر ہوگی، سی این جی سیکٹر کو دوبارہ بحال کر دیا جائے گا۔ اس دوران شہریوں اور ٹرانسپورٹرز کو متبادل ایندھن کے استعمال کی ہدایت کی گئی ہے تاکہ روزمرہ کے معمولات کم سے کم متاثر ہوں۔