پی ڈی ایم اے خیبرپختونخوا نے 15 اگست سے اب تک ہونے والی بارشوں اور فلش فلڈز سے متعلق تازہ رپورٹ جاری کر دی ہے۔ رپورٹ کے مطابق صوبے کے مختلف اضلاع میں قدرتی آفات کے باعث مجموعی طور پر 406 افراد جاں بحق جبکہ 247 زخمی ہوئے ہیں۔
پی ڈی ایم اے کے مطابق جاں بحق افراد میں 305 مرد، 55 خواتین اور 46 بچے شامل ہیں، جبکہ زخمیوں میں 179 مرد، 38 خواتین اور 30 بچے شامل ہیں۔
ڈی آئی خان میں بارش کے نتیجے میں گھروں کی چھتیں گرنے کے باعث 8 افراد جاں بحق اور 48 زخمی ہوئے۔ ادارے کے مطابق صوبے بھر میں بارشوں اور فلش فلڈ کے دوران مجموعی طور پر 3526 گھروں کو نقصان پہنچا، جن میں سے 2945 جزوی طور پر متاثر جبکہ 577 مکانات مکمل طور پر منہدم ہوئے۔
سب سے زیادہ نقصان ضلع بونیر میں رپورٹ ہوا ہے جہاں اب تک جاں بحق افراد کی تعداد 337 تک پہنچ گئی، جبکہ ضلع صوابی میں 46 اموات کی تصدیق ہوئی ہے۔ دیگر متاثرہ اضلاع میں سوات، باجوڑ، مانسہرہ، شانگلہ، دیر لوئر، بٹگرام اور ڈی آئی خان شامل ہیں۔
پی ڈی ایم اے کے مطابق متعلقہ اضلاع کی انتظامیہ کو امدادی سرگرمیاں تیز کرنے اور متاثرین کو فوری ریلیف فراہم کرنے کی ہدایت کر دی گئی ہے۔ ترجمان نے کہا کہ پی ڈی ایم اے اور تمام ادارے آپس میں مسلسل رابطے میں ہیں اور صورتحال پر کڑی نظر رکھی جا رہی ہے۔
پی ڈی ایم اے کا ایمرجنسی آپریشن سنٹر مکمل طور پر فعال ہے، جبکہ عوام کسی بھی ناخوشگوار واقعے، موسمی صورتحال یا فوری اطلاع کے لیے ہیلپ لائن 1700 پر رابطہ کر سکتے ہیں۔
