خیبر پختونخوا کے ضلع اپر دیر کے علاقے شرنگل کے گاؤں جاتکول میں سال 2019 سے 2026 کے دوران جنگلات میں نمایاں کمی ریکارڈ کی گئی ہے۔
سیٹلائٹ تصاویر کے مطابق اس عرصے میں تقریباً 66.58 ہیکٹر رقبے پر موجود گھنے جنگلات ختم ہو چکے ہیں، جس کے باعث پہلے سرسبز و شاداب علاقے اب بتدریج بنجر زمین میں تبدیل ہوتے دکھائی دے رہے ہیں۔
ماہرین ماحولیات کے مطابق بڑے پیمانے پر درختوں کی کٹائی سے نہ صرف مٹی کے کٹاؤ اور لینڈ سلائیڈنگ کے خطرات میں اضافہ ہو رہا ہے بلکہ مقامی حیاتیاتی تنوع اور پورے ماحولیاتی نظام پر بھی منفی اثرات مرتب ہو رہے ہیں۔
ماحولیاتی ماہرین نے اس صورتحال پر شدید تشویش کا اظہار کرتے ہوئے کہا ہے کہ یہ رجحان غیر قانونی لکڑی کی کٹائی اور جنگلات کے تحفظ کے ناقص انتظامات کی نشاندہی کرتا ہے۔
انہوں نے خبردار کیا ہے کہ اگر فوری اور مؤثر اقدامات نہ کیے گئے تو آئندہ برسوں میں ماحولیاتی نقصان مزید بڑھ سکتا ہے اور علاقے کی قدرتی خوبصورتی شدید متاثر ہو سکتی ہے۔
