ناران کے علاقے گیٹی داس میں دورانِ گشت پولیس موبائل پر نامعلوم مسلح افراد نے اچانک فائرنگ کر دی، جس کے نتیجے میں دو پولیس اہلکار زخمی ہو گئے۔ واقعہ تھانہ ناران کی حدود میں پیش آیا، جبکہ گیٹی داس چوکی کی موبائل معمول کے گشت پر تھی۔
زخمی اہلکاروں کو فوری طور پر قریبی اسپتال منتقل کیا گیا، جہاں انہیں طبی امداد دی گئی۔ ڈاکٹروں کے مطابق دونوں اہلکاروں کی حالت اب خطرے سے باہر ہے۔
فائرنگ کے واقعے کی اطلاع ملتے ہی ڈسٹرکٹ پولیس آفیسر (ڈی پی او) مانسہرہ، شفیع اللہ گنڈا پور جائے وقوعہ کے لیے روانہ ہو گئے۔ ڈی ایس پی پارس اور ایس ایچ او ناران بھاری نفری کے ہمراہ موقع پر پہنچے اور علاقے کو گھیرے میں لے کر سرچ آپریشن کا آغاز کر دیا۔
ذرائع کے مطابق چلاس پولیس کو بھی آن بورڈ لے کر بین الاضلاعی ناکہ بندیاں قائم کی گئی ہیں تاکہ حملہ آوروں کی گرفتاری کو یقینی بنایا جا سکے۔
ڈی پی او مانسہرہ شفیع اللہ گنڈا پور کا کہنا ہے کہ پولیس فورس کے حوصلے بلند ہیں، اور عوام کے جان و مال کے تحفظ کے لیے تمام وسائل بروئے کار لائے جا رہے ہیں۔ اُن کا کہنا تھا کہ ملزمان کو جلد قانون کے کٹہرے میں لایا جائے گا اور آپریشن اس وقت تک جاری رہے گا جب تک مجرم گرفتار نہیں ہو جاتے۔
