مری: ملتان سے مری آنے والے سیاحوں کی گاڑی مری ایکسپریس وے پر خوفناک حادثے کا شکار ہو گئی، جس کے نتیجے میں 10 افراد جاں بحق جبکہ 13 افراد زخمی ہو گئے۔
ابتدائی اطلاعات کے مطابق سیاحوں کی تیز رفتار ٹیوٹا ہائی ایس گاڑی دورانِ سفر بے قابو ہو کر سڑک کنارے دیوار سے ٹکرا گئی۔ زور دار ٹکر کے باعث گاڑی میں اچانک آگ بھڑک اٹھی، جس سے اندر موجود افراد کو شدید نقصان پہنچا۔
ریسکیو ذرائع کے مطابق حادثے کی اطلاع ملتے ہی امدادی ٹیمیں موقع پر پہنچ گئیں اور آگ پر قابو پانے کے بعد زخمیوں اور جاں بحق افراد کو قریبی اسپتال منتقل کیا گیا۔ زخمیوں کو طبی امداد فراہم کی جا رہی ہے جبکہ بعض کی حالت تشویشناک بتائی جا رہی ہے۔
حکام کے مطابق حادثے کی وجوہات جاننے کے لیے تحقیقات شروع کر دی گئی ہیں۔ ابتدائی طور پر تیز رفتاری اور گاڑی کے کنٹرول سے باہر ہونے کو ممکنہ سبب قرار دیا جا رہا ہے، تاہم حتمی نتیجہ انکوائری کے بعد سامنے آئے گا۔
حادثے کے بعد علاقے میں افسوس اور سوگ کی فضا چھا گئی جبکہ متاثرہ خاندانوں سے اظہارِ ہمدردی کیا جا رہا ہے۔
