خیبر پختونخوا حکومت نے گاڑیوں کے جرائم میں استعمال کی روک تھام اور عوامی سہولت کو مدنظر رکھتے ہوئے گاڑیوں کی رجسٹریشن کے قانون میں اہم تبدیلی متعارف کرائی ہے۔ اس نئے نظام کے تحت اب گاڑیوں کے نمبر اور نمبر پلیٹیں چیسز کے بجائے مالکان کے قومی شناختی کارڈ سے منسلک ہوں گی۔ یہ قانون فوری طور پر صوبے بھر میں نافذالعمل ہو گیا ہے جبکہ گاڑی مالکان کو اپنی گاڑیاں 30 نومبر 2025 تک اپنے نام منتقل کرنے کی ڈیڈ لائن دی گئی ہے۔
نئے قانون کے مطابق، 30 نومبر کے بعد تمام رجسٹریشن نمبرز اور نمبر پلیٹس ایکسائز ریکارڈ میں موجود مالکان کے شناختی کارڈ سے جڑ جائیں گے۔ وہ گاڑی مالکان جنہوں نے اپنی گاڑیاں فروخت کی ہیں، انہیں لازم ہوگا کہ وہ اس بات کو یقینی بنائیں کہ فروخت شدہ گاڑیاں خریدار کے نام منتقل ہو جائیں۔
گاڑی فروخت کرنے کی صورت میں پرانا مالک اپنی رجسٹریشن کاپی یا سمارٹ کارڈ اپنے پاس رکھے گا جو غیر فعال ہو جائے گا، تاہم نمبر پلیٹ اسی مالک کے پاس محفوظ رہے گی۔ نئی گاڑی خریدنے کی صورت میں مالکان اپنے پرانے رجسٹریشن نمبر اور پلیٹس نئی گاڑی پر منتقل کر سکتے ہیں۔ اس کے علاوہ غیر فعال نمبر پلیٹ کو سالانہ بایومیٹرک تصدیق کے بعد تین سال تک محفوظ رکھا جا سکتا ہے۔ اگر تین سال کی مدت کے دوران نمبر کسی دوسری گاڑی پر منتقل نہ ہوا تو وہ نمبر منسوخ کر دیا جائے گا اور مالک کو رجسٹریشن کاپی، سمارٹ کارڈ اور پلیٹس محکمہ ایکسائز کے حوالے کرنا ہوں گی۔
حکام کے مطابق شہری اگر اپنی گاڑیاں وقت پر اپنے نام پر منتقل نہ کریں تو انہیں مستقبل میں مالی نقصان اور قانونی پیچیدگیوں کا سامنا کرنا پڑ سکتا ہے۔
