چیف سیکرٹری خیبرپختونخوا شہاب علی شاہ کی زیرصدارت پبلک ہیلتھ انجینئرنگ (پی ایچ ای) ڈپارٹمنٹ کے روڈمیپ سے متعلق اہم اجلاس منعقد ہوا، جس میں صوبے کے عوام کو صاف اور محفوظ پینے کے پانی کی فراہمی کے اقدامات کا تفصیلی جائزہ لیا گیا۔
اجلاس کو بتایا گیا کہ پانی کے نمونوں کے ٹیسٹ میں 15 فیصد اضافے کا ہدف کامیابی سے حاصل کرلیا گیا ہے۔ محکمہ نے مزید سہولت کے لیے ایک موبائل ایپ تیار کرنے پر بھی کام شروع کردیا ہے، جس کے ذریعے شہری نہ صرف اپنی شکایات درج کرا سکیں گے بلکہ بلوں کی ادائیگی بھی کرسکیں گے۔ یہ ایپ محکمہ کے مینجمنٹ انفارمیشن سسٹم (ایم آئی ایس) سے منسلک ہوگی جبکہ اس میں ملازمین کی ایچ آر مینجمنٹ اور ای ٹاسکنگ کے فیچرز بھی شامل ہوں گے۔
اعداد و شمار کے مطابق، جولائی 2025 میں 298 پانی کے نمونے ٹیسٹ کئے گئے جن میں سے 220 کو موزوں جبکہ 78 کو غیر موزوں قرار دیا گیا۔ اگست 2025 میں دوبارہ ٹیسٹ کئے گئے 63 نمونوں میں سے 40 درست اور 23 غیر موزوں پائے گئے۔ آلودگی کی وجوہات سامنے آنے پر کلورینیشن سمیت اصلاحی اقدامات بھی کئے گئے، جبکہ چیف انجینئر اور سرکل سطح پر اجلاس منعقد کرکے صورتحال کی بہتری پر کام کیا گیا۔
چیف سیکرٹری نے ہدایت دی کہ جاری منصوبوں کو بروقت مکمل کیا جائے اور غیر فعال سکیموں کو فعال بنایا جائے تاکہ عوام کو صاف پانی کی فراہمی یقینی بنائی جاسکے۔ ان کا کہنا تھا کہ محفوظ پینے کا پانی صوبے کے گڈ گورننس فریم ورک کا ایک لازمی جزو ہے اور اس میں کسی قسم کی کوتاہی برداشت نہیں کی جائے گی۔
