انسپکٹر جنرل آف پولیس خیبرپختونخوا ذوالفقار حمید کی ہدایت پر پولیس شہداء کے خاندانوں کے لیے خصوصی فنڈ جاری کر دیا گیا۔ اس سلسلے میں ضلع مانسہرہ کے 31 شہداء کے اہل خانہ کو مجموعی طور پر 15 لاکھ 50 ہزار روپے مالیت کے چیکس فراہم کیے گئے۔
چیکس کی تقسیم ایس پی سٹی ریشم جہانگیر نے ڈسٹرکٹ پولیس آفیسر مانسہرہ شفیع اللہ گنڈا پور کے احکامات پر انجام دی۔ اس موقع پر ڈی پی او شفیع اللہ گنڈا پور نے کہا کہ خیبرپختونخوا پولیس اپنے شہداء کے لواحقین کو فیملی کا حصہ سمجھتی ہے۔ ان کے مطابق پولیس کے بہادر سپوتوں نے ملک و قوم کی حفاظت کے لیے اپنی جانوں کا نذرانہ پیش کیا، اور ان کی قربانیاں ہمیشہ یاد رکھی جائیں گی۔
انہوں نے مزید کہا کہ آئی جی خیبرپختونخوا کی خصوصی ہدایت پر فراہم کی جانے والی یہ مالی معاونت شہداء کے اہل خانہ کے ساتھ پولیس کے محبت اور ذمہ داری کے رشتے کی عکاسی کرتی ہے۔ یہ سلسلہ مستقبل میں بھی جاری رہے گا تاکہ لواحقین کو ہر ممکن سہولت میسر آ سکے۔
