ہریپور: اسسٹنٹ کمشنر خانپور جناب جنید اقبال نے آج شام ٹی ایچ کیو ہسپتال خانپور کا اچانک دورہ کیا تاکہ عوام کو فراہم کی جانے والی طبی سہولیات کا جائزہ لیا جا سکے اور ہسپتال کی کارکردگی کو مزید بہتر بنایا جا سکے۔
دورے کے دوران انہوں نے ایمرجنسی شفٹ میں تعینات عملے کی حاضری چیک کی، ضروری ادویات کی دستیابی کا جائزہ لیا اور ہسپتال میں مجموعی صفائی ستھرائی کی صورتحال کا معائنہ کیا۔
اس کے علاوہ انہوں نے ایمرجنسی اور دیگر وارڈز میں موجود مریضوں سے ملاقات کی اور ان سے فراہم کی جانے والی سہولیات، عملے کے رویے اور علاج کے معیار کے بارے میں دریافت کیا۔
صفائی اور ادویات کی دستیابی میں پائے جانے والے مسائل پر اسسٹنٹ کمشنر نے ایم ایس ٹی ایچ کیو ہسپتال کو فوری احکامات جاری کیے کہ ہسپتال میں ہمہ وقت صفائی یقینی بنائی جائے اور ضروری ادویات چوبیس گھنٹے دستیاب رہیں تاکہ مریضوں کو درپیش مشکلات کم کی جا سکیں۔
یہ دورہ عوامی خدمت میں بہتری لانے اور صحت کی سہولیات کو زیادہ ذمہ دار، فعال اور مؤثر بنانے کی انتظامیہ کی سنجیدہ کوششوں کا حصہ ہے۔
