ایبٹ آباد: تھانہ لورہ کی فوری کارروائی، یتیم بچے سے زیادتی میں ملوث ملزم گرفتار.

ایس ایچ او تھانہ لورہ چنن خان نے یتیم اور بے سہارا بچے کے ساتھ مبینہ زیادتی کے واقعے کا فوری نوٹس لیتے ہوئے نفری کے ہمراہ بروقت کارروائی کی۔ پولیس نے متاثرہ بچے کے لواحقین کی مدعیت میں متعلقہ دفعات کے تحت مقدمہ درج کر کے ملزم کی گرفتاری کے لیے چھاپہ مار کارروائیاں شروع کیں۔
پولیس ذرائع کے مطابق واقعے کی اطلاع ملتے ہی تھانہ لورہ کی ٹیم موقع پر پہنچ گئی، شواہد اکٹھے کیے گئے اور متاثرہ بچے کو فوری طور پر طبی معائنے اور قانونی کارروائی کے لیے متعلقہ مرکز منتقل کیا گیا۔ تفتیش کے دوران ملزم کی نشاندہی ہونے پر پولیس نے مختلف مقامات پر چھاپے مارے اور مختصر وقت میں ملزم کو گرفتار کر لیا۔ گرفتار ملزم کو مزید تفتیش کے لیے حوالات منتقل کر دیا گیا ہے جبکہ شواہد کی روشنی میں کیس کی مکمل چھان بین جاری ہے۔
علاقہ مکینوں نے پولیس کی اس بروقت، جرات مندانہ اور پیشہ ورانہ کارروائی کو سراہتے ہوئے تھانہ لورہ کی ٹیم کو خراجِ تحسین پیش کیا ہے۔ عوامی حلقوں کا کہنا ہے کہ ایسے حساس اور سنگین مقدمات میں فوری ایکشن سے قانون پر اعتماد بحال ہوتا ہے۔ انہوں نے مطالبہ کیا کہ متاثرہ بچے کو مکمل قانونی تحفظ اور انصاف فراہم کیا جائے اور اس قسم کے گھناؤنے جرائم میں ملوث عناصر کو قرار واقعی سزا دی جائے تاکہ معاشرے میں ایسے واقعات کی روک تھام ممکن ہو سکے۔
پولیس حکام کا کہنا ہے کہ بچوں کے خلاف جرائم ناقابلِ برداشت ہیں اور اس حوالے سے زیرو ٹالرنس پالیسی پر عمل کیا جا رہا ہے۔ انہوں نے عوام سے اپیل کی کہ کسی بھی مشکوک سرگرمی یا واقعے کی اطلاع فوری طور پر قریبی تھانے یا ہیلپ لائن پر دیں تاکہ بروقت کارروائی یقینی بنائی جا سکے۔