بٹگرام میں کمسن رائیڈرز کے خلاف سخت کریک ڈاؤن، والدین سے بیانِ حلفی لینے کا فیصلہ.

بٹگرام: ضلعی پولیس نے شہر اور مضافاتی علاقوں میں ٹریفک حادثات میں اضافے کے پیشِ نظر کمسن موٹر سائیکل سواروں اور ٹریفک قوانین کی خلاف ورزی کرنے والوں کے خلاف بڑے پیمانے پر کریک ڈاؤن کا آغاز کر دیا ہے۔ یہ کارروائیاں ڈی پی او بٹگرام قمر حیات خان کی خصوصی ہدایات پر کی جا رہی ہیں، جن کا کہنا ہے کہ انسانی جانوں کا تحفظ پولیس کی اولین ترجیح ہے۔
ٹریفک وارڈن پولیس نے شہر کے داخلی و خارجی راستوں، مرکزی بازار، تعلیمی اداروں کے اطراف اور اہم چوراہوں پر خصوصی ناکہ بندیاں قائم کیں۔ کارروائیوں کے دوران بغیر رجسٹریشن موٹر سائیکل چلانے والے افراد، ہیلمٹ کے بغیر سفر کرنے والے شہریوں، کم عمر ڈرائیورز اور ون ویلنگ جیسے خطرناک عمل میں ملوث نوجوانوں کے خلاف قانونی کارروائی عمل میں لائی گئی۔ متعدد موٹر سائیکلیں تھانوں میں بند کر دی گئیں جبکہ خلاف ورزی کرنے والوں کو جرمانے بھی عائد کیے گئے۔
پولیس حکام کے مطابق اس مہم کی خاص بات یہ ہے کہ کم عمر بچوں کی جانب سے موٹر سائیکل چلانے کی صورت میں صرف جرمانہ کرنے پر اکتفا نہیں کیا جا رہا بلکہ ان کے والدین یا سرپرستوں کو طلب کر کے تحریری بیانِ حلفی لیا جا رہا ہے۔ بیانِ حلفی میں والدین اس بات کی ضمانت دیتے ہیں کہ وہ آئندہ اپنے نابالغ بچوں کو موٹر سائیکل چلانے کی اجازت نہیں دیں گے اور ٹریفک قوانین کی پابندی کو یقینی بنائیں گے۔ حکام کا کہنا ہے کہ اس اقدام کا مقصد والدین میں احساسِ ذمہ داری پیدا کرنا اور قیمتی جانوں کو ضائع ہونے سے بچانا ہے۔
یاد رہے کہ گزشتہ ہفتے بٹگرام کے علاقے چپھرگرام میں پیش آنے والے افسوسناک موٹر سائیکل حادثے میں تین نوجوان جان کی بازی ہار گئے تھے، جس کے بعد ضلعی انتظامیہ اور پولیس نے سخت اقدامات کا فیصلہ کیا۔ شہری حلقوں کی جانب سے اس مہم کو سراہا جا رہا ہے جبکہ بعض افراد نے آگاہی مہم مزید مؤثر بنانے پر بھی زور دیا ہے۔
ڈی پی او بٹگرام نے واضح کیا ہے کہ ٹریفک قوانین کی خلاف ورزی کسی صورت برداشت نہیں کی جائے گی اور یہ کریک ڈاؤن آئندہ دنوں میں بھی تسلسل کے ساتھ جاری رہے گا تاکہ سڑکوں کو محفوظ بنایا جا سکے۔