مانسہرہ کے نواحی علاقے ریڑھ بیلہ میں شادی کی خوشی میں منعقدہ نجی تقریب اس وقت خون میں رنگ گئی جب معمولی تلخ کلامی نے دو فریقین کے درمیان مسلح جھگڑے کی شکل اختیار کر لی۔ پولیس کے مطابق ملزم قاسم ولد غالب سکنہ ریڑھ نے مبینہ طور پر باارادہ قتل احسن ولد غلام مرتضیٰ اور سفیر ولد تاج محمد، دونوں سکنہ دارہ مانسہرہ، پر فائرنگ کر دی۔
فائرنگ کے نتیجے میں احسن موقع پر ہی جاں بحق ہو گیا جبکہ سفیر شدید زخمی ہو کر ہسپتال منتقل کیا گیا جہاں اس کی حالت تشویشناک بتائی جا رہی ہے۔
واقعے کی اطلاع ملتے ہی تھانہ صدر پولیس فوری طور پر موقع پر پہنچی اور ملزم کو بروقت کارروائی کرتے ہوئے گرفتار کر لیا۔ پولیس نے مقدمہ درج کر کے مزید تفتیش شروع کر دی ہے۔
