ایبٹ آباد: ایف آئی اے کا کریک ڈاؤن، غیر قانونی ویزا ایجنٹ اشتہاری ملزم گرفتار

ایبٹ آباد، 16 اکتوبر 2026: وفاقی تحقیقاتی ادارے (ایف آئی اے) کمپوزٹ سرکل ایبٹ آباد نے غیر قانونی ویزا ایجنٹوں کے خلاف کارروائی کرتے ہوئے ایک اشتہاری ملزم شکیل احمد ولد شوکت علی کو گرفتار کر لیا ہے۔ ملزم کا تعلق ندیم پارک کالونی، تحصیل و ضلع قصور سے بتایا گیا ہے۔
ڈائریکٹر ایف آئی اے کی ہدایات پر کارروائی
تفصیلات کے مطابق ڈائریکٹر ایف آئی اے پشاور زون کی ہدایات پر غیر قانونی ویزا ایجنٹوں کے خلاف جاری کریک ڈاؤن کے دوران یہ کارروائی سب انسپکٹر بلال تنولی کی سربراہی میں عمل میں لائی گئی۔
متحدہ عرب امارات کے ورک ویزوں کے نام پر رقم لینے کا الزام
ایف آئی اے کے مطابق گرفتار ملزم مقدمہ نمبر 05/2023، مورخہ 11 جنوری 2023، میں مطلوب تھا۔ مقدمہ ایمیگریشن آرڈیننس 1979 کی دفعات 18-B اور 22-B کے تحت درج کیا گیا تھا، جبکہ عدالت نے ملزم کو اشتہاری قرار دے رکھا تھا۔
ملزم پر الزام ہے کہ اس نے متحدہ عرب امارات (UAE) کے ورک ویزے فراہم کرنے کے بہانے شکایت کنندگان سے مجموعی طور پر 5 لاکھ 23 ہزار 500 روپے وصول کیے۔
دو روزہ جسمانی ریمانڈ حاصل
ایف آئی اے حکام کے مطابق گرفتار ملزم کو عدالت میں پیش کیا گیا، جہاں سے اس کا دو روزہ جسمانی ریمانڈ حاصل کر لیا گیا ہے۔ ملزم سے مزید تفتیش جاری ہے تاکہ مقدمے سے متعلق حقائق اور دیگر تفصیلات سامنے لائی جا سکیں۔