لاہور: خاتون سے مبینہ زیادتی کا مقدمہ درج، ایک ملزم گرفتار

لاہور: ڈیفنس سی کے علاقے میں خاتون سے مبینہ زیادتی کے الزام میں پولیس نے مقدمہ درج کرکے ایک ملزم کو گرفتار کرلیا۔
پولیس کے مطابق ایف آئی آر میں الزام عائد کیا گیا ہے کہ ملزمان نے مبینہ طور پر خاتون کو نشہ آور دوا ملا مشروب پلایا، جس کے بعد اس کے ساتھ زیادتی کی گئی۔
پولیس نے واقعے کا مقدمہ پاکستان پینل کوڈ کی متعلقہ دفعہ کے تحت درج کرلیا ہے، جبکہ واقعے کی مزید تحقیقات جاری ہیں۔
پولیس کا کہنا ہے کہ گرفتار ملزم سے تفتیش کی جا رہی ہے، جبکہ دیگر مبینہ ملزمان کی گرفتاری کے لیے بھی کارروائیاں جاری ہیں۔
واضح رہے کہ رواں سال جون میں لاہور میں دو غیرملکی خواتین کے مبینہ اغوا اور زیادتی کا معاملہ بھی سامنے آیا تھا۔ پولیس کے مطابق اس کیس میں 8 افراد کو گرفتار کیا گیا تھا اور خواتین سے مبینہ طور پر تاوان کا مطالبہ بھی کیا گیا تھا۔
تازہ واقعے کے حوالے سے پولیس کا کہنا ہے کہ تحقیقات مکمل ہونے کے بعد مزید حقائق سامنے آئیں گے۔