.مانسہرہ: بلہگ پائین سے نوجوان کی لاش ملنے کا معمہ حل، مبینہ قاتل گرفتار، دورانِ تفتیش اعترافِ جرم

مانسہرہ (کرائم رپورٹر): تھانہ صدر کی حدود بلہگ پائین سے نوجوان کی لاش ملنے کے واقعے کا معمہ حل ہوگیا، پولیس نے جدید تکنیکی ذرائع کی مدد سے قتل میں ملوث نامزد ملزم طیب ولد جاوید کو گرفتار کرلیا۔
تفصیلات کے مطابق پھلڑہ کے رہائشی محمد شکیل ولد محمد مسعود نے تھانہ صدر پولیس کو رپورٹ درج کرائی کہ اس کا بھائی عدیل اور طیب ولد جاوید، دونوں اسلام آباد میں ڈسٹرکٹ جیل کے فیملی کوارٹرز کے قریب شاہ جی فوڈ ہوٹل پر کام کرتے تھے۔ مدعی کے مطابق عدیل چار سے پانچ روز قبل اسلام آباد سے گھر آیا تھا اور گزشتہ روز عصر کے وقت اپنے موٹرسائیکل پر طیب سے ملاقات کے لیے مانسہرہ پہنچا، جہاں سے طیب اسے گھومنے پھرنے کے بہانے بلہگ پائین لے گیا اور مغرب کے قریب نامعلوم وجوہات کی بنا پر فائرنگ کرکے قتل کردیا۔
واقعے کی اطلاع ملتے ہی ڈی پی او مانسہرہ محمد وقاص خان نے ملزم کی فوری گرفتاری کے لیے ایس ایچ او تھانہ صدر ملک عامر کو خصوصی ہدایات جاری کیں۔ پولیس نے لاش کا پوسٹ مارٹم مکمل ہونے کے بعد قانونی کارروائی کا آغاز کیا اور جدید ٹیکنیکل ذرائع استعمال کرتے ہوئے واردات میں ملوث ملزم طیب ولد جاوید کو ٹریس کرکے گرفتار کرلیا۔
پولیس کے مطابق دورانِ تفتیش ملزم نے قتل کا اعتراف کرتے ہوئے مؤقف اختیار کیا کہ مقتول کی جانب سے اس کی نازیبا ویڈیوز بنائے جانے پر دونوں کے درمیان تنازع چل رہا تھا، جس کی بنا پر اس نے عدیل کو فائرنگ کرکے قتل کیا۔ پولیس کا کہنا ہے کہ گرفتار ملزم سے مزید تفتیش جاری ہے۔