مانسہرہ: تھانہ پھلڑہ کی حدود حسو میں بچوں کی معمولی لڑائی پر تین افراد قتل، مبینہ ملزم ایک ماہ گزرنے کے باوجود گرفتار نہ ہو سکا

مقتولین کے ورثاء کا ڈی پی او مانسہرہ سے نوٹس لینے اور ملزم کی گرفتاری یقینی بنانے کا مطالبہ
مانسہرہ: تھانہ پھلڑہ کی حدود میں واقع علاقے حسو میں بچوں کی معمولی لڑائی کے نتیجے میں فائرنگ کے واقعے میں تین افراد کے قتل اور دو افراد کے زخمی ہونے کے مقدمے میں مبینہ ملزم کی ایک ماہ گزرنے کے باوجود گرفتاری عمل میں نہ آنے پر مقتولین کے ورثاء نے ڈی پی او مانسہرہ سے نوٹس لینے کا مطالبہ کیا ہے۔
اس سلسلے میں فیاض ولد محمد مسکین، سکنہ حسو پھلڑہ، نے بتایا کہ بچوں کی معمولی لڑائی کے دوران نثار ولد محمد مسکین نے مبینہ طور پر فائرنگ کی، جس کے نتیجے میں ان کی اہلیہ، ان کے بھائی اور ان کے بھائی کے سسر جاں بحق ہو گئے، جبکہ ان کا بیٹا اور بھاوج زخمی ہوئے۔
فیاض کے مطابق واقعے کا مقدمہ تھانہ پھلڑہ میں درج ہے، تاہم ایک ماہ گزرنے کے باوجود نامزد ملزم گرفتار نہیں ہو سکا۔
مقتولین کے ورثاء نے ڈی پی او مانسہرہ سے مطالبہ کیا ہے کہ معاملے کا فوری نوٹس لیا جائے، مقدمے کی مؤثر پیروی کی جائے اور ملزم کی گرفتاری کے لیے ضروری قانونی اقدامات کیے جائیں تاکہ متاثرہ خاندان کو انصاف مل سکے۔
نوٹ: خبر میں بیان کردہ الزامات شکایت کنندہ کے مؤقف پر مبنی ہیں، جن کی آزادانہ تصدیق نہیں کی گئی۔