وفاقی وزیر سردارمحمدیوسف نے اسلام آباد کی تاریخی اور روحانی پہچان فیصل مسجد میں منعقدہ سالانہ محفلِ حسنِ قرأت، حمد و نعت کی پروقار تقریب میں شرکت کی۔ اس روح پرور محفل میں ملک بھر سے نامور قرّاء کرام اور نعت خواں حضرات نے شرکت کی اور اپنی دلنشین آوازوں میں قرآنِ کریم کی تلاوت اور حضور اکرم ﷺ کی شان میں عقیدت کے نذرانے پیش کیے۔
تقریب کے دوران فیصل مسجد کا ماحول روحانیت، خشوع و خضوع اور ایمان افروز کیفیت سے معمور رہا۔ شرکاء نے انتہائی انہماک اور عقیدت کے ساتھ تلاوتِ کلامِ پاک اور نعتِ رسولِ مقبول ﷺ سماعت کی۔ وفاقی وزیر سردار محمد یوسف نے اس موقع پر محفل کے انعقاد کو خوش آئند قرار دیتے ہوئے کہا کہ ایسی تقریبات نہ صرف نوجوان نسل میں دینی شعور بیدار کرتی ہیں بلکہ معاشرے میں امن، محبت اور رواداری کے فروغ کا ذریعہ بھی بنتی ہیں۔
انہوں نے منتظمین کی کاوشوں کو سراہا اور اس امید کا اظہار کیا کہ مستقبل میں بھی اس طرح کی دینی و روحانی محافل کا تسلسل برقرار رکھا جائے گا۔ آخر میں ملکی سلامتی، استحکام اور امتِ مسلمہ کی فلاح و بہبود کے لیے خصوصی دعائیں کی گئیں۔
تقریب کی تصویری جھلکیاں اس روحانی اجتماع کے نورانی لمحات اور شرکاء کے جذباتِ عقیدت کی خوبصورت عکاسی کرتی ہیں-
