بٹگرام: ضلع بٹگرام کے علاقے نیلی شنگ میں شاہراہِ ریشم (قراقرم ہائی وے) پر پیش آنے والے ایک افسوسناک ٹریفک حادثے میں آئل ٹینکر کا ڈرائیور جاں بحق ہوگیا۔
ذرائع کے مطابق آئل ٹینکر نیلی شنگ پولیس چوکی کے قریب سفر کر رہا تھا کہ اچانک بریک فیل ہونے کے باعث ڈرائیور گاڑی پر قابو نہ رکھ سکا۔ بے قابو ٹینکر سڑک سے نکل کر گہری کھائی میں جا گرا، جس کے نتیجے میں ڈرائیور شدید زخمی ہوگیا اور موقع پر ہی دم توڑ گیا۔
حادثے کی اطلاع ملتے ہی مقامی پولیس، ریسکیو اہلکاروں اور علاقہ مکینوں نے جائے وقوعہ پر پہنچ کر امدادی کارروائیاں شروع کیں۔ جاں بحق ڈرائیور کی لاش کھائی سے نکال کر قانونی کارروائی کے لیے قریبی ہسپتال منتقل کر دی گئی۔
پولیس کے مطابق ابتدائی تحقیقات میں حادثے کی ممکنہ وجہ بریک فیل ہونا قرار دی جا رہی ہے، تاہم واقعے کے مختلف پہلوؤں کا جائزہ لیا جا رہا ہے۔ حادثے کے بعد شاہراہِ ریشم پر ٹریفک کی روانی کچھ وقت کے لیے متاثر رہی، جسے بعد ازاں بحال کر دیا گیا۔
مزید تفصیلات اور جاں بحق ڈرائیور کی شناخت موصول ہونے پر خبر کو اپ ڈیٹ کیا جائے گا۔
