ایبٹ آباد: خفیہ معلومات پر کی گئی کامیاب کارروائی کے دوران ہزارہ ریجن کے تعلیمی اداروں کے طلباء کو آئس سپلائی کرنے والے دو سمگلر رنگے ہاتھوں گرفتار کر لیے گئے۔
گرفتار ملزمان کی شناخت عاصم شاہ ولد مبارک شاہ اور قاصم علی ولد محمد نصیر ساکنان مانسہرہ کے ناموں سے ہوئی ہے۔
کارروائی کے دوران 6000 گرام آئس برآمد کر لی گئی۔
پریس ریلیز کے مطابق ایکسائز اینڈ ٹیکسیشن آفیسر (کاؤنٹر نارکوٹکس آپریشنز) ماجد خان کو خفیہ ذرائع سے اطلاع ملی تھی کہ مذکورہ ملزمان ہزارہ ریجن کے تعلیمی اداروں کے طلباء میں آئس کی ترسیل میں ملوث ہیں۔
اطلاع کی خفیہ تصدیق اور مکمل ریکی کے بعد ماجد خان کی سربراہی میں ناصر اقبال خان سرکل آفیسر اور شکیل خان ایس ایچ او تھانہ ایکسائز کے زیرِ نگرانی ٹیم نے عجب باغ چیک پوسٹ پر مؤثر ناکہ بندی کی۔
ناکے کے دوران گاڑی نمبر AHE-018 کو مشکوک جان کر روکا گیا، تلاشی لینے پر بھاری مقدار میں آئس برآمد ہوئی جس پر ملزمان کو موقع پر گرفتار کر کے تھانہ ایکسائز مردان منتقل کر دیا گیا۔
مزید تفتیش اور قانونی کارروائی جاری ہے۔
