ایبٹ آباد : کمشنر ہزارہ کی زیر صدارت خسرہ و روبیلا مہم کی تیاریوں کا اجلاس، اضلاع کو ہنگامی اقدامات کی ہدایت۔
کمشنر ہزارہ ڈویژن کی زیر صدارت خسرہ و روبیلا (Measles-Rubella) مہم کی تیاریوں سے متعلق ایک اہم اجلاس کمشنر آفس ایبٹ آباد میں منعقد ہوا۔ اجلاس میں تمام اضلاع کے ڈپٹی کمشنرز، ڈسٹرکٹ ہیلتھ آفیسرز، ای پی آئی کوآرڈینیٹرز، اور متعلقہ محکموں کے نمائندگان نے شرکت کی۔
اجلاس کے دوران کمشنر ہزارہ نے مہم کی مکمل تیاری اور مربوط منصوبہ بندی پر زور دیتے ہوئے کہا کہ خسرہ و روبیلا سے بچوں کا تحفظ حکومت کی اولین ترجیح ہے، اس لیے تمام اضلاع اپنی تیاریاں بروقت مکمل کریں۔انہوں نے ہدایت کی کہ تمام اضلاع میں سیاسی قیادت، علمائے کرام اور مقامی نمائندوں کو مہم میں شامل کیا جائے تاکہ عوامی اعتماد اور آگاہی میں اضافہ ہو۔
مہم کے دوران والدین کو اپنے بچوں کو ویکسین لگوانے کی ترغیب دینے کے لیے سوشل موبلائزیشن سرگرمیوں کو مزید مؤثر بنانے پر زور دیا گیا۔کمشنر ہزارہ نے تمام اضلاع کو ہدایت کی کہ ویکسین، کولڈ چین، اور لاجسٹک سپورٹ کے تمام انتظامات وقت پر مکمل کیے جائیں، جبکہ مہم کے دوران ریئل ٹائم ڈیٹا رپورٹنگ اور مانیٹرنگ پلان پر سختی سے عمل درآمد یقینی بنایا جائے۔
انہوں نے کہا کہ“یہ مہم بچوں کے بہتر مستقبل کے لیے ایک قومی ذمہ داری ہے، اس میں کسی قسم کی کوتاہی برداشت نہیں کی جائے گی۔ تمام اضلاع اس مہم کو مثالی بنانے کے لیے ٹیم ورک اور سنجیدگی کے ساتھ کام کریں۔”اجلاس میں موجود افسران نے کمشنر ہزارہ کو یقین دلایا کہ مہم کے دوران تمام انتظامات کو مؤثر انداز میں پایہ تکمیل تک پہنچایا جائے گا۔
