ایس ایم بی آر کا ایس ڈی ایل آر پراجیکٹ کا دورہ؛ منصوبے کی پیش رفت اور اہم اقدامات پر بریفنگ-

پشاور، 31 دسمبر — سینئر ممبر، بورڈ آف ریونیو (SMBR)، خیبر پختونخوا نے سیٹلمنٹ اینڈ ڈیجیٹائزیشن آف لینڈ ریکارڈز (SDLR) پراجیکٹ کا سرکاری دورہ کیا، جہاں انہیں منصوبے کے مقاصد، اب تک کی پیش رفت اور آئندہ کے لائحۂ عمل پر تفصیلی بریفنگ دی گئی۔
دورے کے دوران پراجیکٹ ڈائریکٹر اور سینئر افسران نے ایس ایم بی آر کو SDLR پراجیکٹ کے مجموعی دائرہ کار سے آگاہ کیا، جس کا مقصد جدید سروے تکنیکوں، ڈیجیٹائزیشن اور ادارہ جاتی اصلاحات کے ذریعے درست، شفاف اور GIS پر مبنی اراضی ریکارڈ کا قیام ہے۔ بریفنگ میں اہم اجزاء شامل تھے جن میں فیلڈ سیٹلمنٹ آپریشنز، جدید سروے ٹیکنالوجیز کا استعمال، پرانے ریکارڈز کی ڈیجیٹائزیشن، GIS ڈیٹا بیس کا قیام اور سروس ڈیلیوری کے مؤثر نظام شامل ہیں۔
ایس ایم بی آر کو اب تک حاصل کی گئی کامیابیوں، مختلف اضلاع میں جاری سرگرمیوں اور عملدرآمد کے دوران درپیش چیلنجز سے بھی آگاہ کیا گیا۔ اس کے علاوہ آئندہ منصوبہ بندی پر بھی روشنی ڈالی گئی، جس میں ضروری آلات و سازوسامان کی خریداری، انسانی وسائل کی استعداد کار میں اضافہ، ادارہ جاتی مضبوطی اور سروس ڈیلیوری کو مزید بہتر بنانے کے اقدامات شامل ہیں۔