حویلیاں پولیس کی بڑی کارروائی، سنگین مقدمات میں مطلوب اشتہاری مجرم گرفتار.

حویلیاں پولیس نے اہم کارروائی کرتے ہوئے سنگین نوعیت کے مقدمات میں مطلوب اشتہاری مجرم عامر ولد امریز خان کو گرفتار کر لیا۔ پولیس کے مطابق ملزم کافی عرصے سے قانون نافذ کرنے والے اداروں کو مطلوب تھا اور گرفتاری سے بچنے کے لیے روپوش تھا۔
پولیس حکام کا کہنا ہے کہ ملزم کے خلاف تھانہ ناڑہ میں مقدمہ نمبر 323 مورخہ 01-10-2024 درج ہے، جس میں انسداد دہشت گردی ایکٹ کی دفعہ 7ATA سمیت تعزیراتِ پاکستان کی دفعات 324 (اقدامِ قتل)، 353 (سرکاری ملازم پر حملہ)، 186 (سرکاری امور میں مداخلت)، 34 PPC اور 15AA KPK شامل ہیں۔ اس کے علاوہ تھانہ حویلیاں میں مقدمہ نمبر 639 مورخہ 13-07-2024 بجرم 302 (قتل)، 324، 353، 109 (اکسانا/معاونت) اور 34 PPC کے تحت بھی ملزم پولیس کو مطلوب تھا۔
ڈی پی او کی ہدایات پر ایس ایچ او حویلیاں کی سربراہی میں خصوصی ٹیم نے خفیہ اطلاع پر کارروائی کرتے ہوئے ملزم کو گرفتار کیا۔ پولیس کے مطابق ملزم کو مزید تفتیش کے لیے متعلقہ تھانے منتقل کر دیا گیا ہے جبکہ دیگر سہولت کاروں اور ساتھیوں کی گرفتاری کے لیے بھی چھاپے مارے جا رہے ہیں۔
پولیس نے عزم ظاہر کیا ہے کہ جرائم پیشہ عناصر کے خلاف کارروائیاں بلاامتیاز جاری رہیں گی اور امن و امان کے قیام کو ہر صورت یقینی بنایا جائے گا۔