ایوب ٹیچنگ ہسپتال کے ڈپٹی ڈائریکٹر آئی ٹی انجینئر شہریار علی ہزارہ الیکٹرک کمپنی کے منیجر آئی ٹی تعینات.

ہزارہ الیکٹرک کمپنی (ہیزکو) کے بورڈ آف ڈائریکٹرز نے پورے ملک سے موصول ہونے والی درخواستوں اور تفصیلی جانچ پڑتال کے بعد ایوب ٹیچنگ ہسپتال ایبٹ آباد کے ڈپٹی ڈائریکٹر آئی ٹی، انجینئر شہریار علی کو منیجر آئی ٹی تعینات کرنے کی منظوری دے دی ہے۔ باقاعدہ تقرری نامہ جاری کر دیا گیا ہے اور وہ جلد اپنے نئے عہدے کا چارج سنبھالیں گے۔
سلہڈ سے تعلق رکھنے والے انجینئر شہریار علی کو ایوب ٹیچنگ ہسپتال میں آئی ٹی ڈیپارٹمنٹ کے قیام کا بانی تصور کیا جاتا ہے۔ انہوں نے اپنے دورِ خدمات کے دوران ادارے میں جدید، مربوط اور خودکار (Automated) آئی ٹی نظام متعارف کروائے جن کے باعث مریضوں کی رجسٹریشن، ریکارڈ کیپنگ، لیبارٹری رپورٹس، مالیاتی امور اور انتظامی معاملات میں شفافیت اور تیزی آئی۔
انہوں نے ہسپتال میں ڈیجیٹل ڈیٹا مینجمنٹ سسٹم، آن لائن اپائنٹمنٹ سروس، بائیومیٹرک حاضری نظام، اور مختلف شعبہ جات کے مابین مربوط سافٹ ویئر سسٹم نافذ کیے، جس سے نہ صرف وقت کی بچت ہوئی بلکہ انسانی غلطیوں میں بھی نمایاں کمی آئی۔ سسٹم اپ گریڈیشن اور سائبر سیکیورٹی کے اقدامات کے ذریعے ادارے کے ڈیجیٹل انفراسٹرکچر کو جدید تقاضوں سے ہم آہنگ کیا گیا۔
انجینئر شہریار علی نے صحت سہولت پروگرام کے مؤثر نفاذ میں بھی کلیدی کردار ادا کیا، جس کے تحت مریضوں کو علاج معالجے کی سہولیات کی فراہمی میں آسانی ہوئی اور مالیاتی معاملات کی نگرانی مزید شفاف بنی۔ ان کی پیشہ ورانہ صلاحیتوں اور قائدانہ کردار کو طبی و انتظامی حلقوں میں قدر کی نگاہ سے دیکھا جاتا ہے۔
ذرائع کے مطابق ہزارہ الیکٹرک کمپنی کو ایک ایسے وژن رکھنے والے آئی ٹی ماہر کی ضرورت تھی جو ادارے کو ڈیجیٹلائزیشن، اسمارٹ سسٹمز اور جدید ٹیکنالوجی کی جانب لے جا سکے۔ توقع کی جا رہی ہے کہ انجینئر شہریار علی اپنی پیشہ ورانہ مہارت سے کمپنی میں آئی ٹی کے شعبے کو مزید مستحکم کریں گے اور صارفین کو بہتر سہولیات کی فراہمی میں اہم کردار ادا کریں گے۔
سماجی، عوامی اور پیشہ ورانہ حلقوں کی جانب سے انجینئر شہریار علی کو اس اہم تقرری پر مبارکباد پیش کی جا رہی ہے اور ان کے روشن مستقبل کے لیے نیک خواہشات کا اظہار کیا جا رہا ہے۔