پریس کلب حویلیاں اور ٹریفک پولیس ایبٹ آباد کی مشترکہ کاوشوں کے نتیجے میں حویلیاں کے علاقے دوڑ نالہ کے مقام پر متبادل راستے کی تعمیر کا باضابطہ آغاز کر دیا گیا ہے۔ یہ منصوبہ خاص طور پر ٹریفک کی روانی بہتر بنانے اور شہریوں کو روزمرہ آمدورفت میں درپیش مشکلات کو کم کرنے کے مقصد سے شروع کیا گیا ہے۔
اس موقع پر ایس ایس پی ٹریفک اشتیاق خان نے اپنی ٹیم اور پریس کلب حویلیاں کے ممبران کے ہمراہ سائٹ کا دورہ کیا اور جاری تعمیراتی کام کا تفصیلی جائزہ لیا۔ انہوں نے متعلقہ حکام کو ہدایت کی کہ کام کو معیار کے مطابق اور جلد از جلد مکمل کیا جائے تاکہ علاقے کے رہائشی اور مسافر جلد از جلد اس سہولت سے مستفید ہو سکیں۔
ایس ایس پی اشتیاق خان نے کہا کہ “ٹریفک کی بہتری اور شہریوں کی سہولت ہماری اولین ترجیح ہے۔ اس ضمن میں تمام دستیاب وسائل بروئے کار لائے جا رہے ہیں تاکہ عوامی سہولت کو یقینی بنایا جا سکے۔”
انہوں نے پریس کلب حویلیاں کے تعاون کو سراہتے ہوئے کہا کہ “یہ باہمی تعاون عوامی مفاد کے منصوبوں میں بہتری کا باعث ہے اور امید ہے کہ مستقبل میں بھی ایسے عوام دوست اقدامات کے لیے تعاون جاری رہے گا۔”
یہ متبادل راستہ نہ صرف موجودہ ٹریفک بوجھ کو کم کرے گا بلکہ ایمبولینس، اسکول بسوں اور عام مسافروں کے لیے آمدورفت میں آسانی بھی فراہم کرے گا، جس سے علاقے میں رہنے والے شہریوں کے روزمرہ مسائل میں واضح کمی آئے گی۔
