ہزارہ یونیورسٹی اور دی اسمارٹ اسکول کالج دوراہا کیمپس مانسہرہ کے درمیان تعلیمی تعاون کا معاہدہ.

مانسہرہ میں تعلیم کے فروغ اور ادارہ جاتی تعاون کو مضبوط بنانے کے لیے ہزارہ یونیورسٹی مانسہرہ اور دی اسمارٹ اسکول کالج دوراہا کیمپس کے درمیان مفاہمتی یادداشت (MoU) پر باضابطہ دستخط کر دیے گئے۔ اس حوالے سے تقریب 9 مارچ 2026 کو ہزارہ یونیورسٹی کے وائس چانسلر سیکرٹریٹ میں منعقد ہوئی جس میں دونوں اداروں کے اعلیٰ حکام اور تعلیمی شخصیات نے شرکت کی۔
تقریب کے دوران دی اسمارٹ اسکول کالج دوراہا کیمپس کی نمائندگی کرتے ہوئے کیمپس ڈائریکٹر محمد زبیر نے جبکہ ہزارہ یونیورسٹی مانسہرہ کی جانب سے وائس چانسلر پروفیسر ڈاکٹر اکرام اللہ خان نے مفاہمتی یادداشت پر دستخط کیے۔ اس موقع پر یونیورسٹی کے رجسٹرار، ڈائریکٹر ORIC، چیئرپرسن شعبہ تعلیم پروفیسر ڈاکٹر الیاس خان، چیئرپرسن شعبہ پولیٹیکل سائنس و انٹرنیشنل ریلیشنز پروفیسر ڈاکٹر عادل سیماب، مینیجر UIL اور دیگر انتظامی افسران بھی موجود تھے۔
معاہدے کے مطابق دی اسمارٹ اسکول کالج دوراہا کیمپس مانسہرہ میں ہزارہ یونیورسٹی کے اساتذہ اور ملازمین کے بچوں کو خصوصی تعلیمی سہولیات فراہم کی جائیں گی۔ اس سلسلے میں ماہانہ فیسوں میں 20 فیصد تک رعایت جبکہ داخلہ فیس اور سالانہ چارجز میں 50 فیصد تک خصوصی رعایت دی جائے گی، جس کا مقصد یونیورسٹی کے عملے کو معیاری اور نسبتاً کم لاگت تعلیم کی سہولت فراہم کرنا ہے۔
اس شراکت داری کے تحت ہزارہ یونیورسٹی کے طلبہ کو اسکول کیمپس میں انٹرن شپ اور عملی تربیت کے مواقع بھی فراہم کیے جائیں گے تاکہ وہ تدریسی اور انتظامی امور کا عملی تجربہ حاصل کر سکیں۔ اس اقدام سے طلبہ کو اپنی پیشہ ورانہ صلاحیتوں کو بہتر بنانے اور مستقبل کے کیریئر کے لیے بہتر تیاری کا موقع ملے گا۔
تقریب سے خطاب کرتے ہوئے وائس چانسلر پروفیسر ڈاکٹر اکرام اللہ خان نے کہا کہ تعلیمی اداروں کے درمیان اس نوعیت کے اشتراک سے نہ صرف تدریسی معیار میں بہتری آتی ہے بلکہ طلبہ کو عملی میدان سے بھی روشناس ہونے کا موقع ملتا ہے۔ انہوں نے اس بات پر زور دیا کہ یونیورسٹی کمیونٹی اور نجی تعلیمی اداروں کے درمیان مضبوط روابط تعلیم کے فروغ میں اہم کردار ادا کرتے ہیں۔
دونوں اداروں نے اس عزم کا اظہار کیا کہ وہ تعلیم کے فروغ، تحقیق اور کمیونٹی کی ترقی کے لیے مستقبل میں بھی باہمی تعاون کو مزید وسعت دیں گے۔ یہ مفاہمتی یادداشت تین سال تک مؤثر رہے گی اور باہمی رضامندی سے اس میں توسیع بھی کی جا سکے گی۔
تعلیمی حلقوں کے مطابق مانسہرہ میں قائم ہونے والے اس نئے تعلیمی ادارے کے لیے یہ معاہدہ ایک اہم سنگِ میل کی حیثیت رکھتا ہے۔ ماہرین کا کہنا ہے کہ اس تعاون سے نہ صرف دونوں اداروں کے درمیان روابط مضبوط ہوں گے بلکہ علاقے کے طلبہ کو بھی بہتر اور معیاری تعلیمی مواقع میسر آئیں گے۔