🚨 بٹگرام میں بڑا ایکشن: سوشل میڈیا پر اسلحہ کی نمائش کرنے والا ملزم گرفتار

بٹگرام: (مانسہرہ_ڈاٹ_کام) ڈسٹرکٹ پولیس آفیسر (DPO) بٹگرام قمر حیات خان (PSP) کی خصوصی ہدایات پر تھانہ سٹی پولیس نے بروقت اور مؤثر کارروائی کرتے ہوئے سوشل میڈیا پر اسلحہ کی نمائش کرنے والے ملزم کو جدید ٹیکنالوجی کی مدد سے ٹریس کر کے گرفتار کر لیا۔
پولیس ذرائع کے مطابق ملزم مختلف ڈیجیٹل پلیٹ فارمز پر غیر قانونی اسلحہ لہرا کر ویڈیوز اور تصاویر شیئر کر رہا تھا، جس سے نہ صرف قانون کی خلاف ورزی ہو رہی تھی بلکہ عوام میں خوف و ہراس بھی پھیل رہا تھا۔ واقعے کا نوٹس لیتے ہوئے پولیس نے فوری طور پر سوشل میڈیا مانیٹرنگ کے ذریعے ملزم کی شناخت کی اور کامیاب کارروائی کرتے ہوئے اسے گرفتار کر لیا۔
پولیس کا کہنا ہے کہ ملزم کے قبضے سے اسلحہ بھی برآمد کر لیا گیا ہے جبکہ اس کے خلاف متعلقہ دفعات کے تحت مقدمہ درج کر کے مزید تفتیش کا آغاز کر دیا گیا ہے۔ مزید انکشافات کی توقع ظاہر کی جا رہی ہے، جن کی روشنی میں مزید گرفتاریاں بھی عمل میں لائی جا سکتی ہیں۔
ڈی پی او بٹگرام قمر حیات خان نے اس موقع پر واضح کیا کہ ضلع میں اسلحہ کلچر کے فروغ اور قانون شکنی کو کسی صورت برداشت نہیں کیا جائے گا۔ انہوں نے کہا کہ سوشل میڈیا پر غیر قانونی سرگرمیوں میں ملوث عناصر کے خلاف زیرو ٹالرنس پالیسی کے تحت سخت کارروائیاں جاری رہیں گی۔
انہوں نے مزید کہا کہ بٹگرام پولیس عوام کے جان و مال کے تحفظ اور امن و امان کے قیام کے لیے ہمہ وقت متحرک ہے، اور کسی کو بھی معاشرے کا سکون خراب کرنے کی اجازت نہیں دی جائے گی۔ شہریوں سے بھی اپیل کی گئی ہے کہ وہ ایسی سرگرمیوں کی فوری اطلاع پولیس کو دیں تاکہ بروقت کارروائی ممکن بنائی جا سکے۔
عوامی حلقوں کی جانب سے پولیس کی اس کارروائی کو سراہا جا رہا ہے اور اسے علاقے میں امن کے قیام کی جانب ایک مثبت قدم قرار دیا جا رہا ہے۔