🏛️ مانسہرہ میں انتقالات کا نظام ڈیجیٹل کرنے کا فیصلہ

(مانسہرہ_ڈاٹ_کام) دیگر اضلاع کی طرح ضلع مانسہرہ میں بھی ہاتھ سے لکھے گئے انتقالات (رجسٹریشن آف پراپرٹی ٹرانسفر) کو مکمل طور پر بند کرنے کے احکامات جاری کر دیے گئے ہیں۔ ذرائع کے مطابق اب تمام انتقالات صرف کمپیوٹرائزڈ نظام کے تحت درج کیے جائیں گے، جس کا مقصد شفافیت کو یقینی بنانا اور جعلسازی جیسے مسائل کا خاتمہ کرنا ہے۔
حکام کا کہنا ہے کہ نئے نظام کے تحت اراضی کے ریکارڈ کو ڈیجیٹلائز کیا جا رہا ہے، جس سے نہ صرف عوام کو سہولت ملے گی بلکہ سرکاری دفاتر میں کام کی رفتار بھی تیز ہوگی۔ کمپیوٹرائزڈ انتقالات کے ذریعے ریکارڈ محفوظ، قابلِ رسائی اور ہر قسم کی رد و بدل سے محفوظ بنایا جا سکے گا۔
مزید برآں، اس اقدام سے کرپشن کی روک تھام، ریکارڈ کی درستگی اور قانونی پیچیدگیوں میں کمی آئے گی۔ شہریوں کو ہدایت کی گئی ہے کہ وہ اپنے انتقالات کے اندراج کے لیے متعلقہ لینڈ ریکارڈ سنٹرز سے رجوع کریں اور نئے نظام کے مطابق کارروائی مکمل کریں۔