کوہاٹ کے علاقے کالو بانڈہ میں افسوسناک واقعہ: فائرنگ سے تین سگے بھائی جاں بحق.

(مانسہرہ_ڈاٹ_کام ) کوہاٹ: علاقے کالو بانڈہ میں ایک افسوسناک اور دل دہلا دینے والا واقعہ پیش آیا، جہاں نامعلوم افراد کی فائرنگ کے نتیجے میں تین سگے بھائی جاں بحق ہو گئے۔ واقعے کی اطلاع ملتے ہی علاقے میں خوف و ہراس پھیل گیا جبکہ پولیس اور ریسکیو ادارے فوری طور پر حرکت میں آ گئے۔
ریسکیو 1122 کے کنٹرول روم کو ایمرجنسی کال موصول ہوتے ہی میڈیکل ٹیمیں بروقت جائے وقوعہ پر پہنچ گئیں۔ ریسکیو اہلکاروں نے موقع پر پہنچ کر لاشوں کو تحویل میں لیا اور ضروری قانونی کارروائی کے لیے ڈسٹرکٹ ہیڈکوارٹرز ہسپتال کوہاٹ منتقل کر دیا۔
ابتدائی اطلاعات کے مطابق جاں بحق ہونے والے تینوں افراد آپس میں سگے بھائی تھے اور ان کا تعلق کالو بانڈہ سے ہے۔ جاں بحق افراد کی شناخت درج ذیل ہے:
1۔ احمد زمان ولد محمد زمان، عمر 25 سال
2۔ فیصل زمان ولد محمد زمان، عمر 30 سال
3۔ اکبر زمان ولد محمد زمان، عمر 20 سال
واقعے کے بعد پولیس نے علاقے کو گھیرے میں لے کر شواہد اکٹھے کرنا شروع کر دیے ہیں جبکہ ملزمان کی تلاش کے لیے کارروائیاں جاری ہیں۔ ابتدائی طور پر واقعے کی وجہ معلوم نہیں ہو سکی، تاہم ذاتی دشمنی سمیت مختلف پہلوؤں پر تفتیش کی جا رہی ہے۔
ریسکیو 1122 کوہاٹ کے ترجمان جواد آفریدی کے مطابق ٹیموں نے فوری رسپانس دیتے ہوئے اپنی ذمہ داریاں احسن طریقے سے انجام دیں۔
حکام کا کہنا ہے کہ واقعے میں ملوث عناصر کو جلد قانون کے کٹہرے میں لایا جائے گا۔