خیبر پختونخوا میں ایل پی جی کی ناجائز مہنگی فروخت کے خلاف سخت کریک ڈاؤن کا حکم، سرکاری نرخ 305 روپے فی کلو مقرر

پشاور: حکومت خیبر پختونخوا نے صوبے بھر میں ایل پی جی کی مقررہ سرکاری قیمت سے زائد نرخوں پر فروخت، ذخیرہ اندوزی اور بلیک مارکیٹنگ کے خلاف سخت کارروائی کا فیصلہ کرتے ہوئے تمام ڈپٹی کمشنرز اور اسسٹنٹ کمشنرز کو فوری کریک ڈاؤن کی ہدایات جاری کر دی ہیں۔
چیف سیکرٹری خیبر پختونخوا کے دفتر سے 10 نومبر 2026 کو جاری ہونے والے نوٹیفکیشن کے مطابق ایل پی جی کی سرکاری قیمت 305 روپے فی کلو مقرر کی گئی ہے۔ تمام اضلاع کی انتظامیہ کو ہدایت کی گئی ہے کہ مارکیٹ میں مقررہ نرخوں پر عمل درآمد یقینی بنایا جائے اور خلاف ورزی کرنے والوں کے خلاف بلاامتیاز کارروائی کی جائے۔
نوٹیفکیشن میں واضح کیا گیا ہے کہ سرکاری نرخ سے زائد قیمت پر ایل پی جی فروخت کرنے والے پلانٹس اور دکانوں کو سیل کیا جائے، ذمہ دار افراد کے خلاف مقدمات درج کیے جائیں اور ضرورت پڑنے پر پولیس کی معاونت سے گرفتاریاں بھی عمل میں لائی جائیں۔
چیف سیکرٹری نے متعلقہ حکام کو ذخیرہ اندوزوں اور ناجائز منافع خوروں پر کڑی نظر رکھنے، تمام متعلقہ محکموں کے درمیان مؤثر رابطہ کاری یقینی بنانے اور روزانہ کی بنیاد پر کارروائی کی رپورٹ پیش کرنے کی بھی ہدایت کی ہے۔
حکومت خیبر پختونخوا کے مطابق عوام کو ایل پی جی اور دیگر ضروری اشیائے خوردونوش سرکاری مقررہ نرخوں پر فراہم کرنا حکومت کی ترجیحات میں شامل ہے، جبکہ ناجائز منافع خوری اور قیمتوں میں غیر قانونی اضافے کو کسی صورت برداشت نہیں کیا جائے گا۔
ان احکامات کے بعد اب دیکھنا یہ ہے کہ ضلعی انتظامیہ مانسہرہ سمیت صوبے بھر میں اس کریک ڈاؤن پر کس حد تک عمل درآمد یقینی بناتی ہے اور شہریوں کو ایل پی جی واقعی 305 روپے فی کلو کے سرکاری نرخ پر دستیاب ہو پاتی ہے یا نہیں۔