پیسے دے کر سرکاری نوکریاں حاصل کرنے والوں کی ملازمتیں ختم ہو سکتی ہیں: فیصل کریم کنڈی

پشاور: گورنر خیبر پختونخوا فیصل کریم کنڈی نے کہا ہے کہ صوبے کے تمام سرکاری محکموں میں غیر قانونی اور قواعد و ضوابط کے برخلاف کی جانے والی بھرتیوں کے خلاف کارروائی شروع کر دی گئی ہے، جبکہ اس عمل میں ملوث ذمہ داران کو بھی جوابدہ بنایا جائے گا۔
گورنر فیصل کریم کنڈی کا کہنا تھا کہ غیر قانونی طریقے سے سرکاری ملازمتیں حاصل کرنے والے افراد کو اپنی نوکریوں سے ہاتھ دھونا پڑیں گے۔ انہوں نے کہا کہ ایسے افراد کو چاہیے کہ وہ ان لوگوں سے رجوع کریں جنہوں نے مبینہ طور پر رقم وصول کرکے انہیں سرکاری ملازمتیں دلوائی تھیں۔
انہوں نے واضح کیا کہ غیر قانونی بھرتیوں کے معاملے پر کارروائی کا عمل جاری ہے اور کسی کو بھی قواعد و ضوابط سے بالاتر نہیں سمجھا جائے گا۔ ان کا کہنا تھا کہ غیر قانونی بھرتیوں میں ملوث افراد کی ذمہ داری کا تعین کرکے انہیں بھی جوابدہ بنایا جائے گا۔