لاہور: ستوکتلہ میں گھریلو تنازع پر فائرنگ، ساس اور سالہ جاں بحق، بیوی اور سالی زخمی

لاہور: لاہور کے علاقے ستوکتلہ میں گھریلو تنازع پر مبینہ طور پر داماد کی فائرنگ سے ساس اور سالہ جاں بحق ہوگئے، جبکہ ملزم کی بیوی اور سالی زخمی ہوگئیں۔ پولیس کے مطابق ملزم فائرنگ کے بعد موقع سے فرار ہوگیا، جس کی گرفتاری کے لیے کارروائیاں جاری ہیں۔
پولیس کے مطابق ملزم مرزا علی یار مبینہ طور پر دیوار پھلانگ کر اپنے سسرالیوں کے گھر میں داخل ہوا اور وہاں موجود اپنی بیوی خالدہ، ساس کلثوم، سالے سمیع اور سالی رمیزہ پر فائرنگ کردی۔
فائرنگ کے نتیجے میں سمیع موقع پر ہی جاں بحق ہوگیا، جبکہ زخمی ہونے والی کلثوم نے اسپتال میں دورانِ علاج دم توڑ دیا۔ واقعے میں زخمی ہونے والی رمیزہ اسپتال میں زیرِ علاج ہے، جبکہ ملزم کی بیوی خالدہ کی حالت تشویش ناک بتائی جاتی ہے اور اسے انتہائی نگہداشت وارڈ (آئی سی یو) میں رکھا گیا ہے۔
پولیس حکام کا کہنا ہے کہ ملزم اور اس کی بیوی کے درمیان طویل عرصے سے گھریلو تنازع چل رہا تھا۔ بتایا گیا ہے کہ بیوی اس سے قبل بھی ملزم کے خلاف مقدمہ درج کروا چکی تھی۔ پولیس واقعے کو اسی تنازع کے تناظر میں دیکھتے ہوئے مختلف پہلوؤں سے تحقیقات کر رہی ہے۔
واقعے کے بعد فرانزک ٹیموں نے جائے وقوعہ سے شواہد اکٹھے کرلیے، جبکہ جاں بحق افراد کی لاشوں کو پوسٹ مارٹم کے لیے مردہ خانے منتقل کردیا گیا ہے۔
پولیس نے ملزم کی گرفتاری کے لیے خصوصی ٹیم تشکیل دے دی ہے اور اس کی تلاش جاری ہے۔ حکام کے مطابق مزید حقائق تفتیش مکمل ہونے کے بعد سامنے آئیں گے۔
قانونی وضاحت: واقعے سے متعلق الزامات کی حتمی تصدیق تفتیش اور عدالتی کارروائی کے ذریعے ہوگی۔