خیبر پختونخوا میں ایمرجنسی پہلے ہی نافذ ہوجانی چاہیے تھی، نواز شریف

لندن: پاکستان مسلم لیگ (ن) کے صدر اور سابق وزیراعظم نواز شریف نے کہا ہے کہ خیبر پختونخوا میں امن و امان کی بگڑتی صورتحال کے پیش نظر ایمرجنسی پہلے ہی نافذ ہوجانی چاہیے تھی۔
لندن میں ایک اجلاس سے خطاب کرتے ہوئے نواز شریف کا کہنا تھا کہ صوبے کے حالات قابو سے باہر ہورہے تھے اور ایمرجنسی کے نفاذ کا فیصلہ پہلے ہی کرلینا چاہیے تھا۔ انہوں نے پاکستان تحریک انصاف (پی ٹی آئی) کی گزشتہ 13 سالہ حکومت کو خیبر پختونخوا کے لیے نقصان دہ قرار دیا۔
نواز شریف نے سوال اٹھایا کہ کسی صوبے کا وزیراعلیٰ سرکاری وسائل استعمال کرتے ہوئے وفاقی دارالحکومت پر حملہ کیسے کرسکتا ہے؟ ان کا کہنا تھا کہ صوبائی وسائل کو اسلام آباد اور دیگر صوبوں کے خلاف استعمال کرنا درست طرزِ عمل نہیں۔
مسلم لیگ (ن) کے صدر نے مزید کہا کہ خیبر پختونخوا کے عوام تحریک انصاف کی حکومت سے آزاد ہوگئے ہیں۔ انہوں نے اس عزم کا اظہار کیا کہ مسلم لیگ (ن) پاکستان کی ترقی اور خوشحالی کے لیے کام کرتی رہے گی، جبکہ وفاقی اور صوبائی حکومتیں عام آدمی کی بہتری کے لیے کوششیں کررہی ہیں۔