خیبر پختونخوا میں آخر کب ختم ہوگا دہشت گردی کا سلسلہ؟ کوہاٹ میں ڈی ایس پی سمیت 10 پولیس اہلکار شہید

کوہاٹ: خیبر پختونخوا میں دہشت گردی کی ایک اور افسوسناک کارروائی کے دوران کوہاٹ کے علاقے میں پولیس پارٹی پر حملے کے نتیجے میں ڈی ایس پی سمیت 10 پولیس اہلکار شہید ہوگئے۔ ایک بار پھر صوبے کے بہادر محافظوں نے امن و امان کے قیام کی کوششوں میں اپنی جانوں کا نذرانہ پیش کر دیا۔
اطلاعات کے مطابق پولیس اہلکار غیر قانونی گولڈ مائننگ کے خلاف کارروائی کے لیے کوہاٹ اور کرک کے درمیان واقع علاقے دربوکچ، جلندھر بانڈہ کی جانب جا رہے تھے کہ راستے میں ان کی گاڑیوں کو فائرنگ کا نشانہ بنایا گیا۔ ابتدائی اطلاعات میں چھ اہلکاروں کی شہادت کی تصدیق کی گئی تھی، تاہم بعد ازاں پولیس حکام کے مطابق شہدا کی تعداد 10 ہوگئی۔
پولیس ترجمان کے مطابق واقعے کے بعد پولیس کی مزید گاڑیاں جائے وقوعہ کی جانب روانہ کر دی گئیں، جبکہ علاقے میں پولیس کی بھاری نفری طلب کرلی گئی۔ ذرائع کے مطابق حملے کے دوران پولیس کی گاڑیوں کو بھی آگ لگائی گئی۔
واقعے کے بعد ڈی ایچ کیو ٹیچنگ اسپتال کوہاٹ میں ایمرجنسی نافذ کر دی گئی۔ پولیس کے پی آر او کے مطابق شہید ہونے والوں میں ڈی ایس پی گمبٹ حیدر زمان اور سب انسپکٹر مختیار بھی شامل ہیں۔
آخر خیبر پختونخوا میں دہشت گردی کا یہ سلسلہ کب تھمے گا؟
صوبے کے مختلف علاقوں میں امن کے قیام کے لیے پولیس اہلکار مسلسل اپنی ذمہ داریاں نبھا رہے ہیں، مگر آئے روز ایسے افسوسناک واقعات عوام کے دلوں میں خوف اور تشویش پیدا کر رہے ہیں۔ سوال یہ ہے کہ کب تک خیبر پختونخوا کے عوام اپنے پیاروں کی شہادتوں کی خبریں سنتے رہیں گے؟ کب وہ دن آئے گا جب صوبے کے شہری خوف کے بجائے امن و سکون کے ماحول میں زندگی گزار سکیں گے؟
یہ واقعہ ایک بار پھر اس حقیقت کی یاد دہانی ہے کہ دہشت گردی کے خاتمے اور پائیدار امن کے قیام کے لیے مؤثر اقدامات ناگزیر ہیں۔ شہید پولیس اہلکاروں کی قربانیاں ہمیشہ یاد رکھی جائیں گی۔
اللہ تعالیٰ شہدا کے درجات بلند فرمائے، ان کے اہلِ خانہ کو صبرِ جمیل عطا فرمائے اور خیبر پختونخوا سمیت پورے ملک میں امن قائم فرمائے۔ آمین۔