ہری پور میں تین یونیورسٹی طالبات کو مبینہ طور پر اغوا کرنے کی کوشش، جان بچانے کے لیے چلتی گاڑی سے چھلانگ لگا دی، ایک طالبہ شدید زخمی

ہری پور: ہری پور یونیورسٹی کی تین طالبات کو مبینہ طور پر زبردستی بھٹری ڈیم لے جانے کی کوشش کا افسوسناک واقعہ سامنے آیا ہے، جہاں خطرے کا احساس ہونے پر تینوں طالبات نے اپنی جان بچانے کے لیے چلتی گاڑی سے چھلانگ لگا دی۔ واقعے کے نتیجے میں تینوں طالبات زخمی ہو گئیں، جبکہ ایک طالبہ کو شدید چوٹیں آنے کے باعث ایبٹ آباد کے ہسپتال منتقل کیا گیا، جہاں وہ تاحال زیرِ علاج ہے۔
ابتدائی اطلاعات کے مطابق تینوں طالبات یونیورسٹی روڈ پر واقع ایک ہی ہاسٹل میں رہائش پذیر ہیں۔ بتایا جاتا ہے کہ طالبات شام کے وقت ہاسٹل سے فاسٹ فوڈ کھانے کے لیے ہری پور شہر کی جانب روانہ ہوئیں۔ اسی دوران مبینہ طور پر دو نامعلوم افراد نے انہیں اپنی گاڑی میں بٹھایا اور بھٹری ڈیم کی جانب لے جانے کی کوشش کی۔
اطلاعات کے مطابق جب گاڑی شہر سے باہر ایک ویران مقام پر پہنچی تو طالبات کو صورتحال مشکوک محسوس ہوئی اور انہیں اپنی سلامتی کے حوالے سے خطرہ لاحق ہوا۔ اس دوران تینوں طالبات نے گاڑی سے نکلنے کی کوشش کرتے ہوئے چلتی گاڑی سے چھلانگ لگا دی، جس کے نتیجے میں وہ زخمی ہو گئیں۔ ایک طالبہ کے سر پر شدید چوٹیں آئیں، جسے فوری طبی امداد کے لیے ایبٹ آباد منتقل کیا گیا۔
واقعے کے بعد ہاسٹل انچارج نے طالبات کو زخمی حالت میں دیکھا تو فوری طور پر ان کے والدین کو اطلاع دی۔ شدید زخمی طالبہ کو ہسپتال منتقل کیا گیا، جہاں اس کا علاج جاری ہے۔
اس افسوسناک واقعے نے ہری پور میں طالبات کی سکیورٹی، ہاسٹلز میں رہائش پذیر طالبات کے تحفظ اور تعلیمی اداروں کے اطراف خواتین کی سلامتی کے حوالے سے اہم سوالات کھڑے کر دیے ہیں۔
شہری حلقوں کی جانب سے مطالبہ کیا جا رہا ہے کہ واقعے کی مکمل اور شفاف تحقیقات کی جائیں، مبینہ طور پر ملوث افراد کی شناخت کرکے انہیں قانون کے کٹہرے میں لایا جائے اور طالبات کے تحفظ کے لیے مؤثر اقدامات کیے جائیں۔